काठमाडौं । सुदन किरातीले प्रगतिशील लोकतान्त्रिक पार्टी (प्रलोपा) परित्याग गरेका छन्।
उनले बुधबार सामाजिक सञ्जाल फेसबुकमार्फत पार्टीको साधारण सदस्यसमेत नरहने गरी राजीनामा दिएको सार्वजनिक गरेका हुन्।
किरातीले करिब पाँच महिना लामो पार्टीसँगको आफ्नो यात्रा टुंग्याएको जनाउँदै यस अवधिमा मार्गदर्शन गर्ने नेताहरू, सहकार्य गर्ने साथीहरू तथा कर्मचारीहरूप्रति आभार व्यक्त गरेका छन्। उनले पार्टीमा बिताएको समयलाई ‘अमूल्य सम्पत्ति’ का रूपमा लिएको उल्लेख गरेका छन्।
फेसबुकमार्फत उनले संगठनसँगको औपचारिक सम्बन्ध अन्त्य भए पनि आगामी दिनमा आपसी सम्मान, सद्भाव र मित्रवत् सम्बन्ध कायम रहने विश्वास व्यक्त गरेका छन्।
पार्टी छाडे पनि राजनीतिबाट टाढा नहुने स्पष्ट पार्दै किरातीले जनताको भरोसा र सहिदहरूको अधुरो सपनालाई आत्मसात् गर्दै देश र जनताको सेवा तथा समाज रूपान्तरणमा निरन्तर लागिरहने प्रतिबद्धता व्यक्त गरेका छन्।
‘मेरो लागि आगामी बाटो सहज नहुन सक्छ, तर जनताको विश्वास र सहिदको बलिदानले देखाएको मार्गमा अघि बढिरहनेछु,’ उनले उल्लेख गरेका छन्।
यसअघि नै पार्टीमा राजीनामा बुझाइसकेका किरातीले औपचारिक रूपमा भने पहिलोपटक सार्वजनिक अभिव्यक्ति दिएका हुन्।
