अर्घाखाँची । सन्धिखर्क गोरुसिंगे सडक खण्डमा जिल्ला प्रशासन कार्यालय अर्घाखाँचीले १० चक्के सबै खालका सवारी सञ्चालनमा पूर्ण रूपमा रोक लगाएको छ । करिब ६ महिना भित्रको अवधिमा चारपटक गाडी दुर्घटना हुँदा २९ जनाको मृत्यु भएपछि जिल्ला प्रशासन कार्यालयले उक्त निर्णय गरेको हो । सन्धिखर्क नगरपालिकाको नरपानी वरिपरिको क्षेत्रमा पटकपटक सवारी दुर्घटना भएपछि उक्त सडकमा पटकपटकको सवारी दुर्घटनाले ठूलो मानवीय क्षती भएको हुँदा बड्दो दुर्घटना न्युनीकरण गर्न बिभिन्न खालका जोखिमहरू कम गर्न १० चक्के ट्रिपर, ट्रकलाई सञ्चालनमा पुर्ण रुपमा रोक लगाएको प्रमुख जिल्ला अधिकारी विजयराज पौडेले जानकारी दिए ।

१० टनसम्म क्षमता भएको सडकमा १८ देखि २२ टनसम्म ट्रिपर ट्रकहरूले लोड बोकेको पाएकोले यस्तो खालको सवारी सञ्चालनले दुर्घटनाका लागि उच्च जोखिम हुने भएको हुँदा सञ्चालनमा रोक लगाएको सहायक प्रमुख जिल्ला अधिकारी विष्णुराज वेल्वासेले बताए । निकै भिडभाड, तीव्र गतिमा एकै साथ अन्य ट्रिपर, ट्रकहरू चलिरहँदा पैदल यात्री, मोटरसाइकल चालक र अन्य गाडी चालकहरूलाई समेतलाई त्रसित बनाएको हुँदा १० मिनेटको अन्तरमा मात्र अब अन्य प्रकृतिका ट्रिपर, ट्रकहरू सञ्चालन गर्न जिल्ला प्रशासनले निर्देशन दिएको प्रजिअ पौडेले बताए ।

सन्धिखर्क नगरपालिका–७ निवासी निमबहादुर रायमाझीले तीव्र गति र ओभर लोडका ठूला ट्रिपरहरूको सञ्चालनले धेरै समस्या सिर्जना गरेकोे बताए । रायमाझीले भने, ‘यो सडकमा धेरै गाडी दुर्घटना भए धेरै नै मान्छेले अकालमै ज्यान गुमाए निकै धेरै क्षति भयो, अब मापदण्ड विपरीत चल्ने जुनसुकै गाडीलाई पनि सरकारको संयन्त्रले कडाभन्दाकडा कारबाही गर्नुपर्छ ।’

देशकै सय पर्यटकीय गन्तव्य मध्येको एक महत्वपूर्ण पर्यटकीयस्थल सुपादेउराली मन्दिर यही सडक खण्डमा पर्ने गर्दछ उक्त मन्दिरमा दैनिक रूपमा निकै धेरैको संख्यामा देशभरबाट दर्शालु भक्तजनहरू आउने गर्दछन् त्यसकारण पनि गोरुसिंगेदेखि सन्धिखर्कको ६८ किलोमिटर पर्ने उक्त सडक निकै नै ब्यस्त हुन्छ ।

साँघुरो उकालो ओरालो बाटो, अत्यधिक धेरै मोडहरू, ट्राफिक नियमको उल्लंघन, लामोदुरीमा पनि एउटै चालकले सवारी सञ्चालन गर्नु, क्षमताभन्दा धेरै लोड बोक्नु, ओभर गतिमा गाडी सञ्चालन गर्नु, अपरिपक्व उमेरमै लाइसेन्स प्राप्त गर्नु, मोबाइलको प्रयोग गर्नु, लापरवाही तवरले गाडी चलाउनु, मादक प्रदार्थको प्रयोग गर्नु, ड्राइभरहरूलाई सामान्य गाडीको इन्जिनको बारेमा प्राविधिक ज्ञान कम हुनु र लामो समयसम्म गाडीको इन्जिनको चेकजाँच गरी मर्मत नगर्नु लगायतका धेरै समस्याहरूका कारण गाडीहरू दुर्घटनाहरू भइरहेका छन् यस्ता विषयमा सबै पक्षले विशेष ध्यान दिई नीतिगत नियमहरूको पालना र बाटोको मर्मत सुधार र स्तरोन्नति गर्नुपर्ने देखिन्छ । सौर्य दैनिकबाट