काठमाडाैँ ।मध्यपूर्वमा जारी तनावपूर्ण युद्धका बीच कूटनीतिक पहलले गति लिएको संकेत देखिएको छ। पाकिस्तानका अधिकारीहरूले इरानले अमेरिकाबाट १५ बुँदे युद्धविराम प्रस्ताव प्राप्त गरेको दाबी गरेका छन्। तर, तेहरानले भने औपचारिक रूपमा यस्तो कुनै वार्तामा संलग्न नरहेको अडान दोहोर्याउँदै आएको छ।
बुधबार नाम सार्वजनिक नगर्ने सर्तमा दुई पाकिस्तानी अधिकारीहरूले उक्त प्रस्ताव इरानसम्म पुगेको जानकारी दिएका हुन्। उनीहरूका अनुसार प्रस्तावमा युद्ध अन्त्यतर्फ लक्षित विभिन्न महत्वपूर्ण बुँदाहरू समावेश छन्, जसको उद्देश्य क्षेत्रीय तनाव घटाउनु रहेको देखिन्छ।
प्रस्तावमा इरानमाथि लगाइएका प्रतिबन्धहरू क्रमशः हटाउने, नागरिक प्रयोजनका लागि आणविक ऊर्जा क्षेत्रमा सहकार्य बढाउने तथा इरानको विवादास्पद आणविक कार्यक्रमलाई सीमित वा फिर्ता गर्ने विषय समेटिएको बताइएको छ। साथै, अन्तर्राष्ट्रिय आणविक ऊर्जा एजेन्सीमार्फत अनुगमनको व्यवस्था गर्ने, मिसाइल क्षमतामा सीमा निर्धारण गर्ने र पर्सियन खाडीको संवेदनशील जलमार्ग स्ट्रेट अफ होर्मुज हुँदै सुरक्षित ढुवानी सुनिश्चित गर्ने पक्ष पनि प्रस्तावमा समावेश गरिएको जनाइएको छ।
अधिकारीहरूले प्रस्तावको विस्तृत विवरण सार्वजनिक गर्न आफूहरू अधिकृत नभएको जनाउँदै यसको समग्र स्वरूप व्यापक कूटनीतिक प्याकेजका रूपमा रहेको संकेत गरेका छन्।
यता, इरानले भने अमेरिकासँग प्रत्यक्ष वार्तामा संलग्न नभएको स्पष्ट पारेको छ। बुधबार एक सैन्य प्रवक्ताले अमेरिकी कूटनीतिक पहलप्रति व्यङ्ग्यात्मक प्रतिक्रिया दिँदै तेहरान आफ्नो अडानमा दृढ रहेको बताएका छन्।
यस घटनाक्रमले एकातर्फ शान्ति प्रयास अघि बढिरहेको संकेत गरे पनि अर्कोतर्फ दुवै पक्षबीचको अविश्वास कायमै रहेको देखिएको छ। यस्तो अवस्थामा प्रस्तावको कार्यान्वयन र भविष्य अझै अनिश्चित रहेको विश्लेषण गरिएको छ।
