तनहुँ । व्यास नगरपालिका–३ बिसघरेस्थित बुल्दीखोला किनारमा जिल्लामै पहिलो आधुनिक र व्यवस्थित बधशाला निर्माण भएको छ । उपभोक्तालाई सफासुग्घर र स्वच्छ मासु उपलब्ध गराउने उद्देश्यले नगरपालिकाले रु २२ लाख खर्चेर बधशाला निर्माण गरेको हो ।
एक रोपनी सार्वजनिक ठाउँमा कुखुरा, भैँसी, राँगो र खसी बोकाको लागि छुट्टाछुट्टै पशु बधस्थलको व्यवस्था मिलाइएको नगरपालिका–३ का वडाध्यक्ष प्रेमकुमार श्रेष्ठले जानकारी दिनुभयो । जथाभावी पशु काटिँदा वातावरण दुर्गन्धित हुनुका साथै उपभोक्ताले स्वच्छ मासु खानाबाट वञ्चित हुँदै आएकोले त्यसलाई न्यूनीकरण गर्न बधशाला निर्माण गरिएको हो । उहाँले भन्नुभयो । “बिजुली विस्तारपश्चात बधशालासम्म जाने बाटोको लागि प्रक्रिया अघि बढाइएको छ ।”
गत कात्तिक मसान्तभित्र सबै कार्य सम्पन्न गरी सञ्चालनमा ल्याउने तयारी भए पनि बधशालासम्म पुग्ने बाटो निर्माण नहुँदा पुस महिनादेखि सञ्चालनमा ल्याउन लागिएको हो । उपभोक्ता समितिले उक्त मार्ग निर्माणमा ढिलाइ गरेमा बोलपत्र प्रक्रियामा जानुपर्ने भएकाले लक्षित समयभन्दा करिब दुई महिना ढिलाइ हुने भएको वडाध्यक्ष श्रेष्ठले जानकारी दिनुभयो ।
बधशाला सञ्चालनमा ल्याउनु अघि मासु व्यवसायी सङ्घ, तनहुँ उद्योग वाणिज्य सङ्घ, उपभोक्ता समितिलगायतका निकायबीच छलफल गरिने योजना छ । बधशालामा पशुबध गरिएको मासु मात्रै बिक्री गरिनेछ । वडासदस्य रविन पौडेलले भन्नुभयो, “सफा, सुग्घर स्वच्छ मासु भए नभएको अनुगमन तथा निरीक्षण कार्यलाई कडाइका साथ लागू गरिने छ ।”
बधशाला नहुँदा मासु व्यवसायीले अस्वस्थ प्रतिस्पर्धाका साथै जथाभावी काटमार गरेर अव्यवस्थित ९खुला० तरिकाले मासु ओसारपसार गर्दै आएकाले त्यसलाई समेत मध्यनजर गरी व्यवस्थित गरिन लागिएको नगरपालिकाले जनाएको छ । व्यवस्थित तरिकाले बधशाला निर्माण गरिएको तनहुँमा यो पहिलो भएको नगरपालिकाले जनाएको छ ।
