भारत भ्रमणमा रहेको न्यूजील्यान्डले विशाखापटनममा खेलिएको चौथो टी२० क्रिकेटमा भारतलाई ५० रनले पराजित गरेको छ । यद्यपी यो हारपछि पनि पाँच खेलको शृंखलामा भारतले ३-१ को अग्रताका साथ शृंखला जितिसकेको छ ।
अब अन्तिम टी२० खेल तिरुबन्थपुरममा शनिबार हुनेछ ।
भारतको विशाखापटनममा सम्पन्न आजको खेलमा भारतले टस जितेर न्यूजील्यान्डलाई ब्याटिङका लागि निम्तो दिएको थियो ।
न्यूजील्यान्डले टिम साइफर्टको ६२, डेभोन कोन्वेको ४४, ड्यारिल मिचेलको ३९ तथा ग्लेन फिलिप्सको २४ रन मद्दतले सात विकेट गुमाएर २१५ रनको विशाल स्कोर खडा गरेको थियो ।
२१६ रनको चुनौती पछ्याएको भारतले सुदृढ खेल प्रदर्शन गर्नुको साटो एकपछि अर्को विकेट गुमाएको थियो । पहिलो ओभरमै ओपनिङ ब्याटर अभिषेक शर्मालाई शून्य रनमै गुमाएको भारतको स्कोरबोर्डमा ९ रन हुँदा कप्तान सूर्यकुमार यादव आउट भएका थिए । उनले ८ रन बनाए ।
त्यसपछि सन्जु सामसनले २४, रिन्कु सिंहले ३९, शिभम दुबेले रनआउट हुनुअघि ६५ रन बनाएका थिए ।
भारतले १६५ रन बनाउँदा सबै विकेट १८.४ ओभरमा गुमाएको थियो । एजेन्सी
