काठमाडौँ: फागुन २१ गते हुने प्रतिनिधिसभा निर्वाचनका लागि नेपाली कांग्रेसले नयाँ रणनीति लागू गर्ने भएको छ ।
यसअघि नै उपसभापति विश्वप्रकाश शर्माको संयोजकत्वमा बनेको चुनावी परिचालन समितिले सो रणनीति लागू गर्नेछ । उक्त समितिले निर्वाचन परिचालन निर्देशिका निर्माण गरिरहेको बताइएको छ । सो समितिले नै चुनावी रणनीति तय गर्ने नेताहरूले जनाएका छन् ।
सो रणनीतिमा कांग्रेसले विभिन्न तहमा रहेका नेता र सदस्यहरू एक महिना चुनावकेन्द्रित हुनुपर्ने कुरा समेटिने छ ।
यही माघ २१ गतेदेखि मतदानको दिनसम्मका लागि नेता तथा कार्यकर्तालाई आ–आफ्नो क्षेत्रमा परिचालन गर्ने गरी सो रणतीनि बनाइएको छ । उपसभापति शर्माले तयार गरिरहेको निर्वाचन परिचालन निर्देशिकामा यो कुरा उल्लेख गरिएको छ ।
उपसभापति शर्माले प्रदेशस्तरीय विशेष आन्तरिक छलफल गर्दै निर्देशिका तयार गर्दैछन् । अहिलेसम्म कर्णाली र सुदूरपश्चिमको छलफल सकिएको छ भने गण्डकीको छलफल हुँदैछ ।
