काठमाडौँ । यही २१ फागुनमा हुने प्रतिनिधिसभाको निर्वाचनका लागि नेपाली कांग्रेसले दुई चरणमा टिकट बाँड्ने भएको छ ।
जस अनुसार पार्टीले आइतबार पहिलो चरणको टिकटको घोषणा गर्नेछ । त्यसैगरी भोलि सोमबार दोस्रो चरणको टिकट वितरण गर्ने गरी तयारी गरिरहेको नेपाली कांग्रेसले जानकारी दिएको छ ।
यस प्रयोजनका लागि कांग्रेसले शनिबार मात्र संसदीय बोर्ड गठन गरेको थियो । सो पार्टीको गगन थापाको सभापतित्वमा नवगठित केन्द्रीय समितिका केही पदाधिकारीहरूलाई राखेर बोर्ड गठन गरिएको हो ।
शनिबारबाटै काम गरिरहेको उक्त बोर्डले आइतबार हिमाली र पहाडी जिल्लाका सदस्यहरुका लागि टिकटको घोषणा गर्ने जनाएको छ । त्यसैगरी भोलि सोमबार बाँकी तराई क्षेत्रका जिल्लामा प्रतिनिधि सभा सदस्यका लागि टिकट वितरण र सार्वजनिक गरिने छ ।
यसैबीच कांग्रेसले अघिल्ला निर्वाचनहरूमा जस्तो कुनै पनि पार्टीसँग चुनावी गठबन्धन गरेर चुनावमा नजाने भएको निर्णय पनि गरेको छ ।
