विश्वका सबैभन्दा धनी व्यक्तिको रूपमा रहेका अमेजन कम्पनीका सीईओ जेफ बेजोसले गत हप्ता अर्बौ डलर सम्पत्ति थप्न सफल भएका छन् । अमेजन कम्पनीको शेयर मूल्यमा उच्च वृद्धि भएसँगै बेजोसले गत शुक्रबार मात्रै ८ अर्ब डलर आम्दानी गरेका हुन् । शुक्रबार अमेजनको शेयर मूल्य प्रतिशेयर २ हजार डलर पुगेको थियो । अमेजनले त्रैमासिक रुपमा आफ्नो आम्दानी रिपोर्ट सार्वजनिक गर्ने गरेको छ ।
यस पटक भने कम्पनीले विश्लेषकहरूको अनुमानलाई गलत साबित गराउन सफल भएको छ । किनभने कम्पनीले विश्लेषकहरुले गरेको अनुमानभन्दा बढि मुनाफा गरेको छ । बिहीबारमात्रै अमेजनले आफ्नो त्रैमासिक आम्दानी रिपोर्ट सार्वजनिक गर्यो। रिपोर्ट सार्वजनिक भएसँगै शुक्रबार अमेजनको शेयर मूल्यमा बढोत्तरी भएको हो । सन् २०१८ मा अमेजन पहिलोपटक १ ट्रिलियन डलरको कम्पनी बनेको थियो ।
योसँगै अमेजन शुक्रबार पुनः १ ट्रिलियन डलरको कम्पनी बन्न सफल भयो । नम्वर वान अर्बपति बेजोसको कुल सम्पत्तिमध्ये अधिकांश हिस्सा अमेजनको शेयरकै रूपमा रहेको छ । उनको नाममा कम्पनीको ५ करोड ७५ लाख कित्ता शेयर छ, जुन कम्पनीको १२ प्रतिशत हो । यस अनुसार, शुक्रबार बेजोसको कुल सम्पत्ति १ खर्ब २४ अर्ब डलर पुगेको थियो जसमध्ये अमेजनको शेयरबापतको मूल्य १ खर्ब १५ अर्ब ६० करोड डलर थियो ।
