मङ्गलबार दोहाबाट बैंककका लागि उडानमा रहेको विमानमा एक थाई महिलाले विमानमै बच्चा जन्माएकी छिन् । विमानमा रहेका समय व्यथा लागेपछि महिलाले विमानका कर्मचारीको सहयोगमा विहान करिब तीन बजे बच्चालाई उडिरहेको विमानमै जन्म दिएकी थिईन् । विमान कम्पनीले महिलाको नाम भने सार्वजनिक गरेकोे छैन ।
विमानमा नै बच्चा जन्मिएपछि चालकले विमानलाई कलकत्तामा नै आकस्मिक अवतरण गरेका बताइएको छ । विमान अवतरणपछि महिला र बच्चा दुबैलाई कलकत्तास्थित एक निजी अस्पतालमा भर्ना गरिएको छ । आमा र बच्चा दुबैको स्वास्थ्य सामान्य रहेको अस्पताल स्रोतले जानकारी दिएको छ ।
कलकत्ता विमानस्थलका अधिकारीले एएनआईलाई भने, “दोहाबाट बैंककका लागि उडेको कतार एअरवेज, क्यूआर–८३०, को विमानले हवाई ट्राफिक नियन्त्रकसँग अनुरोधपछि मङ्गलबार बिहान ३ः०९ बजे भारतको कलकत्ता विमानस्थलमा चिकित्सा प्राथमिकता आवश्यकताका कारण आकस्मिक अवतरण भएको छ । विमान सुरक्षित अवतरण गरेको छ भने सम्बन्धित व्यक्तिलाई चिकित्सक र विमानस्थल टोलीले आवश्यक सहयोग गरिरहेका छन् ।”
