काठमाडौं । काठमाडौं महानगरपालिकाका मेयर बालेन शाहले जाँचबुझ आयोगमा लिखित जवाफ पठाएका छन्। गत भदौ २३ र २४ गते भएको ‘जेनजी आन्दोलन’ सम्बन्धमा बुझ्नका लागि आयोगले मेयर शाहलाई लिखित पत्र पठाएको थियो।
आयोगका प्रवक्ता विज्ञानराज शर्माका अनुसार मेयर शाहले पठाएको लिखित जवाफ आयोगमा प्राप्त भइसकेको छ।
आयोगले बयान संकलनलगायतका प्रारम्भिक काम सम्पन्न गरी अहिले प्रतिवेदन लेखनको काम अघि बढाएको छ। यसअघि आयोगले गृहमन्त्री रमेश लेखकको लिखित वक्तव्य र बयान लिएको थियो।
आयोगले जेनजी आन्दोलनसँग सम्बन्धित विवरण तथा अन्य तथ्यांकहरू यसअघि नै संकलन गरिसकेको जनाएको छ। तल्ला तहका सुरक्षा अधिकारीहरूसँग बयान लिएपछि आयोगले काठमाडौंका तत्कालीन प्रहरी प्रमुख, उपत्यका प्रहरी कार्यालय तथा प्रहरी मुख्यालयका उच्चपदस्थ अधिकारीहरूसँग पनि बयान लिएको थियो।
त्यसबाहेक सशस्त्र प्रहरी बल र राष्ट्रिय अनुसन्धान विभाग, काठमाडौंका प्रमुख जिल्ला अधिकारी, तत्कालीन गृहसचिव, मुख्यसचिवलगायतसँग पनि आयोगले बयान लिएको छ।
प्रधानसेनापति अशोकराज सिग्देलले आफ्ना अधिकारीहरूका साथ आयोगमा उपस्थित भएर बयान दिएका थिए। आयोगले सुरुआती चरणमै पूर्वगृहमन्त्री रवि लामिछाने लगायतसँग पनि बयान लिएको जनाएको छ।
