काठमाडौँ । राष्ट्रिय स्वतन्त्र पार्टी (रास्वपा)ले आगामी फागुन २१ गते हुने प्रतिनिधिसभा सदस्य निर्वाचनका लागि निर्वाचन आयोगमा पेश गरेको समानुपातिक बन्दसूचीबारे विभिन्न सरोकारवालाबाट प्राप्त प्रतिक्रिया र सुझावप्रति ध्यानाकर्षण भएको जनाएको छ।
पार्टी सचिवालयद्वारा जारी विज्ञप्तीमा समय अभावका कारण अन्तिम समयमा गर्नुपर्ने राजनीतिक संवाद र सहमतिका क्रममा बन्दसूची तयार पार्दा केही कमीकमजोरी देखिन सक्ने उल्लेख गरिएको छ। यस्ता सम्भावित त्रुटि सच्याउन पाउने समयको सदुपयोग गर्दै सूची पेश गरिएको पनि पार्टीले स्पष्ट पारेको छ।
रास्वपाले बन्दसूचीमा रहेका त्रुटिहरू सच्याउन निर्वाचन आयोगले उपलब्ध गराएको समयसीमाभित्र आवश्यक सुधार गरी समयमै पुनः पेश गरिने जानकारी दिएको छ।
यसका लागि बन्दसूचीमा सच्याउनुपर्ने विषयमा सुझाव दिन चाहनेलाई पौष १७ गते बिहान १० बजेभित्र सम्बन्धित प्रदेश सभापतिमार्फत वा सिधै पार्टी केन्द्रीय कार्यालयमा सुझाव बुझाउन आग्रह गरिएको छ।
पार्टी सचिवालयले सबै सरोकारवाला, नेता–कार्यकर्ता तथा शुभेच्छुकलाई आवश्यक सुझाव दिन आग्रह गर्दै सहयोगप्रति धन्यवाद व्यक्त पनि गरेको छ।
