काठमाडौं । सत्तारुढ दल राष्ट्रिय स्वतन्त्र पार्टी (रास्वपा)का सांसद डा. धनञ्जय रेग्मीले रसुवा–त्रिशूली करिडोरमा आएको भीषण बाढीबारे चीनले नेपाली पक्षलाई समयमै पूर्वसूचना नदिएको भन्ने आरोप ‘मिथ्या’ र ‘अफवाह’ भएको बताउनुभएको छ ।
शुक्रबार न्युज एजेन्सी नेपालसँग कुरा गर्दै सांसद रेग्मीले हिमालय क्षेत्रमा हुने हिमपहिरो, चट्टान खस्ने तथा हिमताल फुट्ने जस्ता प्राकृतिक घटनाको ठ्याक्कै समय र स्थानबारे पूर्वानुमान गर्न कठिन हुने बताउनुभयो ।
उहाँले चीन र नेपालबीचको सुमधुर सम्बन्धमा असर पर्ने गरी अपुष्ट सूचना तथा अफवाह फैलाउन नहुनेमा सबै पक्ष जिम्मेवार बन्नुपर्ने धारणा राख्नुभयो ।
सांसद रेग्मीले अत्यधिक निगरानी हुने सगरमाथा क्षेत्रमा समेत हिमपहिरो तथा आइसफलबाट हुने दुर्घटना रोक्न नसकिएको उदाहरण दिँदै निगरानी नभएका हिमाली क्षेत्रमा कुन स्थानमा कहिले प्राकृतिक घटना हुन्छ भन्ने पूर्वसूचना दिन झनै कठिन हुने बताउनुभयो ।
उहाँले भन्नुभयो, “चीनतर्फबाट सूचना आदानप्रदान नभएको भनेर आएका ‘रुमर’हरू सबै रुमर नै हुन् । हिमालयमा पूर्वदेखि पश्चिमसम्म आइस र चट्टानै चट्टान छ । कुन चट्टान कहिले खस्छ भन्ने सूचना कसरी हुन सक्छ ?”
सगरमाथामा विश्वभरका पर्वतारोही तथा सञ्चारमाध्यमको ध्यान रहने र मौसमको निरन्तर निगरानी हुने भए पनि आइसफलबाट हुने दुर्घटना पूर्णरूपमा रोक्न नसकिएको उहाँको भनाइ थियो ।
“सगरमाथा त एकदमै नजिकबाट मोनिटर हुने ठाउँ हो । त्यहाँ हुने दुर्घटनाबाट हामीले आफ्ना शेर्पा र विदेशी पर्वतारोहीलाई समेत सधैँ जोगाउन सकेका छैनौँ । अनि मोनिटर नै नभएका देशभरिका कुन ठाउँमा कहिले फुट्छ भनेर कसरी भन्न सकिन्छ ?” उहाँले प्रश्न गर्नुभयो ।
सांसद रेग्मीले नेपालमै विगतमा भएका प्राकृतिक विपद्को उदाहरण दिँदै यस्ता घटनाको पूर्वसूचना सधैँ सम्भव नहुने बताउनुभयो । थामेमा भएको हिमताल फुट्ने घटना तथा सेती नदीमा आएको विपद्को उदाहरण दिँदै उहाँले त्यस्ता घटनाबारे पनि समयमै जानकारी प्राप्त हुन नसकेको उल्लेख गर्नुभयो ।
उहाँले रसुवा–त्रिशूली बाढीका विषयमा चीनसँग पूर्वसूचना हुँदाहुँदै नेपाललाई नदिएको भन्ने आरोप लगाएर दुई देशबीचको सम्बन्ध बिगार्ने काम गर्न नहुने बताउनुभयो ।
सामाजिक सञ्जालमा अपुष्ट सूचना तथा अफवाह फैलाउने क्रम बढेको भन्दै उहाँले सञ्चारमाध्यम र सामाजिक सञ्जाल प्रयोगकर्तालाई जिम्मेवार बन्न आग्रह गर्नुभयो ।
सांसद रेग्मीले हिमनदी, हिमताल तथा प्राकृतिक विपद्सम्बन्धी विषयमा जथाभावी टिप्पणी नगरी सम्बन्धित विषयका विज्ञसँग मात्र धारणा लिन सञ्चारमाध्यमलाई आग्रह गर्नुभयो । विशेषगरी ग्ल्यासियोलोजी अध्ययन गरेका तथा हिमनदी र हिमतालसम्बन्धी विषयमा विज्ञता हासिल गरेका व्यक्तिसँग तथ्यमा आधारित सूचना लिनुपर्ने उहाँको भनाइ छ ।
उहाँले भन्नुभयो, “यी कुरा विषय विज्ञलाई मात्र सोध्नुहोस्, जसले ग्ल्यासियोलोजी पढेका छन् ।”
