काठमाडौँ । पाँचौं खेलमा तेस्रो हारपछि चितवन राइनोजका डेविड मालनले जितका लागि लक्ष्य पर्याप्त भएपनि दोस्रो इनिङमा राम्रो गर्न नसक्दा हार व्यहोरेको बताएका छन् ।
चितवनले राम्रो लक्ष्य प्रश्तुत गरे पनि बलिङमा साथ नपाउँदा जनकपुर बोल्ट्ससँग हार सामना गर्नुपरेको थियो । खेलपछि पत्रकार सम्मेलनमा मालनले आजको खेलमा ओपनिङ साझेदारी परिवर्तन गर्ने निर्णय सही भएपनि दोस्रो इनिङमा राम्रो गर्न नसकेको बताए ।
विदेशी खेलाडीबाट सबैले आशा गरेअनुरुप रवि बोपाराले पछिल्ला खेलहरूमा राम्रो प्रदर्शन गरेको उनले उल्लेख गरे । उनले आज आफ्नो पनि राम्रो प्रदर्शन गर्न आउँदा खुशी लागेको बताए । आगामी दुई खेल जित्दा प्लेअफ पुग्ने सम्भावना रहेको उनले बताए । आगामी खेलमा जित निकाल्न मेहनत गर्ने उनले उल्लेख गरे ।
जनकपुरका कप्तान अनिल साहले आफ्नो रनको खाता र टिमको जितको खाता खोल्न पाउँदा खुशी लागेको बताए । लगातार पहिलो चार खेलमा हारका कारण आजको खेलमा जित आवश्यक रहेको र नतिजा पनि निस्कदा टोलीको मनोबल बढ्ने उनको आशा छ । आजको खेल छिटै जितेकाले नेट रनरेट पनि सुधार हुने उनले उल्लेख गरे । बाँकी दुई खेल जितेपछि मात्र प्लेअफबारे सोध्ने उनको भनाइ छ । यो वर्ष घरेलु र अन्तर्राष्ट्रिय क्रिकेट पनि धेरै नखेलेकाले आजको प्रदर्शन पर्खाइमा रहेको उनी बताउँछन् । पछिल्ला खेलहरूमा रन ननिस्किँदा त्यही दबाब महशुस गरेको उनले स्वीकार गरे ।
आज टिम ब्याक गर्दा रन पनि निस्किनु आफ्ना लागि खुशीको क्षण रहेको उनको भनाइ छ । कप्तानको जिम्मेवारीबाट हटे पनि खेल्ने भने इच्छुक रहे पनि टिमको आवश्यकता अनुरुप बाहिर रहेको उनी बताउँछन् । टिममा अनुभवी खेलाडीहरू धेरै रहेकाले खराब प्रदर्शन हुँदा बाहिर राख्नु स्वभाविक रहेको उनको बुझाइ छ । आज प्रदर्शन गर्न नसकेको भए आफ्ना लागि झन् कठिन हुनसक्ने उनी बताउँछन् । आजभन्दा अघिल्ला खेलमा धेरै मेहनत गरे भने रन ननिस्केको उनले उल्लेख गरे । टिमको प्रदर्शन राम्रो नहुँदा समर्थकमा पनि निराशा छाएको उनी बताउँछन् । जनकपुरका समर्थक जहाँ रहे पनि खेल हेर्ने उनको विश्वास छ ।
