काठमाडौँ। प्रतिनिधि सभा अन्तर्गतको राज्य व्यवस्था तथा सुशासन समितिको बिहीवारको बैठकमा अनुगमन टोलीको कार्यशैली र संसदीय मर्यादाको विषयलाई लिएर चर्काचर्की भएको छ ।
‘राष्ट्रिय सेवा दल विधेयक, २०८३’ उपर सैद्धान्तिक छलफल गर्न बोलाइएको बैठकमा नेकपा (एमाले) की संसदीय दलकी उपनेता एवं पूर्वमन्त्री पद्मा अर्याल र समिति सभापति हरि ढकालबीच भनाभन भएको हो । बैठकमा विशेष समय लिएर बोल्दै एमाले नेतृ अर्यालले समितिको तर्फबाट इटहरीस्थित अख्तियार दुरुपयोग अनुसन्धान आयोगको कार्यालयमा गरिएको अनुगमनका क्रममा टोलीको व्यवहार र कार्यशैलीप्रति गम्भीर प्रश्न उठाउनु भयो । उहाँले समितिले खटाएको टोली नियमसम्मत र मर्यादित ढङ्गले चल्नुपर्नेमा जोड दिँदै कुनै व्यक्तिको स्वाभिमानमा आँच आउने गरी काम गर्न नहुने बताउनु भयो ।
‘समितिले पठाएको टोलीप्रति समितिले नै जवाफ माग्छ, त्यसमा सभापतिले उत्तर दिनुपर्छ ।’ अर्यालले भन्नुभयो, ‘तर सभापतिले जवाफ दिने ठाउँमा अन्य सदस्यले अपमानित गर्नेगरी बोल्नु संसदीय मर्यादा विपरीत छ । हामी अनुशासित र मर्यादित मान्छेलाई उत्तेजित बनाउने काम नहोस् ।’
उहाँले आफूले कसैलाई व्यक्तिगत आक्षेप नलगाएको प्रस्ट पार्दै समितिलाई थप मर्यादित र अनुशासित बनाउन सभापतिको ध्यानाकर्षण गराउनु भयो । बैठकमा अर्यालले प्रश्न उठाउँदै गर्दा राष्ट्रिय स्वतन्त्र पार्टीका सांसद यज्ञमणि न्यौपाने र नेतृ अर्यालबीच केहीबेर सवाल–जवाफ समेत भएको थियो । अर्यालले आफूले सदस्यहरूलाई नभई सभापतिलाई प्रश्न गरेको भन्दै बीचमा अन्य सदस्यले बोल्ने अधिकार नरहेको जिकिर गर्नुभयो ।
जवाफमा समिति सभापति हरि ढकालले समाचारका हेडलाइनका आधारमा मात्र समितिले धारणा नबनाउने स्पष्ट पार्नुभयो । उहाँले अनुगमन टोलीले प्रतिवेदन बुझाइसकेको जानकारी दिँदै उक्त प्रतिवेदन सबै सदस्यले अध्ययन गर्न पाउने बताउनु भयो ।
‘समाचारमा आएका तथ्यभन्दा बाहिरका विषय पनि समितिले फेला पारेको छ ।’ सभापति ढकालले भन्नुभयो, ‘प्रतिवेदन अध्ययन गरिसकेपछि हामी पुनः अख्तियार दुरुपयोग अनुसन्धान आयोगका पदाधिकारीहरूलाई बोलाएर छलफल गर्नेछौँ ।’
विवादका बीच सभापति ढकालले अनुगमनका क्रममा भएका कमजोरी र प्राप्त तथ्यहरूलाई प्रतिवेदनका आधारमा सम्बोधन गरिने प्रतिवद्धता जनाउनुभएको छ । –न्युज एजेन्सी नेपाल
