पर्वत। एक स्थानीय तह, एक आधारभूत अस्पताल योजनाअन्तर्गत विगत छ वर्षअघि शिलन्यास गरिएको यहाँको फलेवास नगरपालिकाको नगर अस्पताल निर्माण सुरु गरिएको छ ।
संघीय सरकारले आर्थिक वर्ष २०७६÷७७ मा प्रत्येक स्थानीय तहमा १० देखि १५ शय्याको आधारभूत अस्पताल निर्माण अघि बढाएलगत्तै फलेवास नगरपालिकाले पनि १५ शय्याको अस्पताल शिलान्यास गरेको थियो । फलेवास नगरपालिका–६ देवीस्थानमा तत्कालीन नगरप्रमुख पदमपाणि शर्माले अस्पतालकोे शिलान्यास गर्नुभएको थियो ।
बजेट अभाव र प्राविधिक त्रुटीका कारण अलपत्र बनेको नगर अस्पताल नयाँ ठेक्का सम्झौता गरेर निर्माण थालिएको हो । चालु आर्थिक वर्ष २०८२÷८३ मा स्वीकृत बजेट रु नौ करोड २८ हजारको लागतमा धमाधम निर्माण अघि बढेको फलेवास नगरपालिकाका नगर प्रमुख गङ्गाधर तिवारीले जानकारी दिनुभयो ।
शिलान्यास गरिएका स्थान भन्दा भवन निर्माणस्थल परिवर्तन गरी नौ रोपनी क्षेत्रफलमा साढे दुई तले भवन तयार गरिने नगरपालिकाका इञ्जिनीयर टङ्कबहादुर खत्रीले जानकारी दिनुभयो ।
अस्पताल बनेपछि सामान्य उपचारका लागि सदरमुकाम कुश्मा, पोखरा तथा बागलुङ पुग्नुपर्ने बाध्यता हट्ने जनाइएको छ । भवन निर्माणको जिम्मा प्रतिष्ठा–जुम्ली–आचार्य जेभी. बागलुङले लिएको छ । रासस
