एजेन्सी । अस्ट्रेलियाले इंग्ल्यान्डविरुद्ध सुरु हुन लागेको एशेज सिरिजका लागि १५ सदस्यीय टोली घोषणा गरेको छ ।
पहिलो टेस्ट म्याच नोभेम्बर २१ मा पर्थमा खेलिनेछ । त्यसपछि पाँच टेस्ट म्याचको यो सिरिज पर्थदेखि ब्रिस्बेन, एडिलेड, मेलबर्न र सिड्नीसम्म चल्नेछ ।
टोलीमा मार्नस लाबुशेनको पुनरागमन भएको छ । लाबुशेनले हालै वेस्ट इन्डिजविरुद्धको तीन टेस्ट म्याचको सिरिज खेलेका थिएनन्, तर उनले फर्स्ट क्लास क्रिकेटमा उत्कृष्ट प्रदर्शन गर्दै टोलीमा पुनः स्थान बनाएका हुन् ।
त्यस्तै, जेक वेदराल्डलाई पनि टोलीमा समावेश गरिएको छ । उनी ओपनिङ ब्याट्सम्यानका रूपमा खेल्न सक्नेछन् र यो उनको टेस्ट डेब्यु पनि हुन सक्छ । वेदराल्डले अघिल्लो शेफिल्ड शिल्ड सिजनमा सबैभन्दा धेरै रन बनाएका थिए र अस्ट्रेलिया ‘ए’ का लागि श्रीलङ्का ‘ए’ विरुद्ध शतक प्रहार गरेका थिए ।
स्मिथ कप्तान
पहिलो टेस्ट म्याचमा चोटग्रस्त प्याट कमिन्सको स्थानमा स्टीभ स्मिथलाई कप्तान बनाइएको छ । तीव्र गतिका बलरहरूमा मिचेल स्टार्क, जोश हेजलवुड र स्कट बोलान्ड समावेश छन् । त्यसबाहेक ब्रेन्डन डगेट र सन् एबट पनि फास्ट बलिङका विकल्पका रूपमा छन् ।
ग्रीनको फिटनेसपछि अन्तिम टोली तय हुने
टोलीमा अलराउन्डर ब्यू वेबस्टर र क्यामरुन ग्रीन पनि छन् । ग्रीनको फिटनेस र बलिङ क्षमतालाई अन्तिम टेस्टअघि मूल्याङ्कन गरिनेछ ।
सेलेक्टर जर्ज बेल्लीका अनुसार १५ मध्ये १४ खेलाडी शेफिल्ड शिल्डमा खेलिरहेका छन् र उनीहरूको वर्तमान फर्मलाई प्राथमिकता दिइनेछ ।
अस्ट्रेलियाको पूर्ण टोलीः
स्टीभ स्मिथ (कप्तान), सन एबट, स्कट बोलान्ड, एलेक्स केरी, ब्रेन्डन डगेट, क्यामरुन ग्रीन, जोश हेजलवुड, ट्राभिस हेड, जोश इंग्लिस, उस्मान ख्वाजा, मार्नस लाबुशेन, नथान लियोन, मिचेल स्टार्क, जेक वेदराल्ड, ब्यू वेबस्टर ।
