काठमाडौँ । इंग्लिस प्रिमियर लिग फुटबल अन्तर्गत आर्सनलले जित निकालेको छ । गएराति भएको खेलमा आर्सनलले बर्नलेलाई उसकै घरेलु मैदानमा २–० गोलले हराएको हो ।
खेलको १४ औं मिनेटमा नै आर्सनलले भिक्टर ग्योकेरेसको गोलबाट सुरुवाती अग्रता लिएको थियो । ३५ औं मिनेटमा डेक्लान राइसले गोल गर्दै आर्सनलको अग्रता दोब्बर पारे । त्यसपछि थप गोल हुन सकेन र आर्सनलले जितको निरन्तरता कायम राख्यो । आर्सनलले पछिल्ला पाँच खेल सबैमा जित निकालेको छ । टोलि १० खेलबाट २५ अंकका साथ शिर्षस्थानमा छ ।
बर्नले १० अंकका साथ १७ औं स्थानमा छ ।
यस्तै, अर्को खेलमा लिभरपुलले एस्टन भिल्लामाथि २–० को जित निकाल्यो । घरेलु मैलान एनफिल्डमा लिभरपुललाई जित दिलाउन खेलको पहिलो हाफको इन्जुरी समयमा मोहम्मद सलाहले तथा ५८ औं मिनेटमा र्यान ग्रावेनवेर्चले गोल गरे ।
लिभरपलुलको यो लगातार चौंथो हारपछिको जित हो । टोलि १० खेलबाट १८ अंकका साथ तेस्रो स्थानमा छ । एस्टन भिल्ला १५ अंकका साथ ११ औं स्थानमा छ ।
यस्तै, अर्को खेलमा म्यान्चेस्टर युनाइटेडले अंक बाँड्यो । नटिङहम फरेस्टसँग युनाइटेड २–२ गोलमा रोकिएको हो ।
खेलको ३४ औं मिनेटमा कासेमिरोले गोल गर्दै युनाइटेडलाई सुरुवाती अग्रता दिलाएका थिए । ४८ औं मिनेटमा मोर्गान गिब्स ह्वाइटले गोल गर्दै घरेलु टोलिलाई १–१ को अवस्थामा ल्याए । ५० औं मिनेटमा निकोलो साभोनाले गोल गर्दै नटिङहमलाई २–१ ले अघि बढाए ।
यता ८१ औं मिनेटमा अमद डियालोले गोल गर्दै युनाइटेडको हार टारे । यो नतिजापछि युनाइटेड १० खेलबाट १७ अंकका साथ सातौं स्थानमा छ भने नटिङहम ६ अंकका साथ १८ औं स्थानमा छ ।
