काठमाडौं । काठमाडौं महानगरपालिकाका प्रमुख बालेन्द्र शाह (बालेन)ले मध्यराति सामाजिक सञ्जालमा आपत्तिजनक स्टाटस लेखेका छन् । उनले लेखेको स्टाटसपछि थप विवादमा तानिएका छन् ।
सार्वजनिक मञ्चहरुमा त्यति धेरै नदेखिने बालेन सामाजिक सञ्जालमा भने निकै सक्रिय छन् । उनले बेलाबेलामा सामाजिक सञ्जालबाटै विवादास्पद स्टाटसहरु लेख्ने गरेका छन् ।
प्राय: आफ्ना विचार सञ्जालबाटै अभिव्यक्त गर्ने उनले शनिबार मध्यराति एउटा स्टाटस लेखे ।
अश्लील शब्दसमेत मिसाएर दुई छिमेकी मुलुक चीन र भारतसहित अमेरिका र नेपालका प्रमुख राजनीतिक दलहरूको नाम उनले स्टाटसमा उल्लेख गरेका थिए ।
उनले नेपाली कांग्रेस, नेकपा एमाले, रास्वपा, राप्रपा र माओवादी केन्द्रप्रति अश्लील शब्द प्रयोग गरेका हुन् ।
बालेनले मध्यराति किन यतिधेरै आक्रोसपूर्ण, अश्लील र आपत्तिजनक लेखे भन्ने प्रश्न पनि उठेको छ ।
बालेनको स्टाटसलाई लिएर अहिले रातिदेखि नै सामाजिक सञ्जालमा बहस र आलोचना सुरु भएको छ ।
उनले अहिले उक्त स्टाटस सञ्जालबाट हटाइसकेका छन् । पोस्ट गरेको केही मिनेटमै उनीमाथि चर्को आलोचना सुरू भैसकेको थियो ।
पछिल्लोपटक बालेनलाई अन्तर्राष्ट्रिय शक्तिसङ्ग साठगाठ गरेको आरोप लाग्ने गरेको छ । यसैबीच उनले चीन, भारत, अमेरिकासहितको नाम उल्लेख गरेर व्यक्त गरेको अभिव्यक्तिमाथि अहिले सञ्जालमा बहस सुरू हुन थालेको छ ।
जेनजी आन्दोलनपछि बनेको अन्तरिम सरकार निर्माणमा अदृश्य शक्ति बनेर सक्रिय भएको आरोप बालेनमाथि लाग्दै आएको थियो ।
बालेनले मध्यराति आपत्तिजनक स्टाटस बेहोसीमा लेखेको टिप्पणी भइरहको छ ।
