काठमाडौं । भारतमा भुवनेश्वर एम्सकी एक महिला डाक्टरलाई घर खाली गर्न दबाब दिइएको छ । ती महिना डाक्टर कोरोना संक्रमितको उपचारमा खटिएकी छन् ।
उनलाई घर खाली नगराएमा बलात्कार गर्नेसम्मको धम्की घरमालिक र स्थानीयले दिएको भारतीय सञ्चारमाध्यमहरूले उल्लेख गरेका छन् । उनी भुवनेश्वर एम्समा जुनियर डाक्टरका रूपमा काम गर्छिन् ।
यो घटनापछि स्थानीय प्रहरीमा उजुरी दर्ता भएपछि घटना बाहिर आएको हो । ती महिला डाक्टरले आफू बसेको स्थानमा आफूलाई घर छाड्न दबाब दिएको र एक व्यक्तिले १ सातादेखि दुःख दिइरहेको बताएकी छन् ।
केही दिनअघि उनलाई बलात्कार गर्नेसम्मको धम्की दिएपछि उनले प्रहरीको ढोका ढकढक्याएकी हुन् ।
उनले आफू केही वर्षदेखि नै सोही क्षेत्रमा बस्दै आएको बताएकी छन् । उनले आफू कोरोना संक्रमणबाट टाढा रहेको बताए पनि घरधनीले उनलाई घर छाड्न निरन्तर दबाब दिएका छन् ।
