काठमाडौँ । इंग्लिस प्रिमियर लिग फुटबल अन्तर्गत न्युक्यासल युनाइटेडले जित निकालेको छ । भर्खरै सम्पन्न खेलमा न्युक्यासलले नटिङहम फरेस्टलाई २–० गोलले हराएको हो ।
घरेलु टोलिको जितमा ब्रुनो गिमारेजले ५८ औं मिनेटमा तथा निक वोल्टमेडले ८४ औं मिनेटमा (पेनाल्टी)मा गोल गरे । न्युक्यासल ७ खेलबाट ९ अंकका साथ तालिकाको ११ औं स्थानमा छ भने नटिङहम ५ अंकका साथ १७ औं स्थानमा छ ।
वल्भ्स र ब्राइटनले अंक बाँडे
यस्तै अर्को खेलमा वल्भ्स र ब्राइटनले १–१ गोलको बराबरी खेल्दै अंक बाँडे । २१ औं मिनेटमा ब्राइटनका बार्ट भर्वुगेनको आत्मघाती गोलबाट वल्भ्सले सुरुवाती अग्रता लिएको थियो । ८६ औं मिनेटमा जान पल भान हेकेले गोल फर्काउँदै ब्राइटनलाई हारबाट जोगाए ।
ब्राइटन ७ खेलबाट ९ अंकका साथ १२ औं स्थानमा छ भने वल्भ्स २ अंकका साथ पुछारमा छ ।
एस्टन भिल्लाले बर्नलेलाई हरायो
यस्तै, अर्को खेलमा एस्टन भिल्लाले बर्नलेलाई २–१ गोलले हरायो । घरेलु टोलिको जितमा डोन्यल मालेनले दुबै गोल गरे । उनले २५ औं र ६३ औं मिनेटमा गोल गरेका हुन् । बर्नलेका लेस्ली उगोचुकुले ७८ औं मिनेटमा गोल गर्दै खेललाई फर्काए पनि अन्तिमसम्म यही नतिजा भयो ।
एस्टन भिल्ला ९ अंकका साथ तालिकाको १३ औं स्थानमा छ भने बर्नले ४ अंकका साथ १८ औं स्थानमा छ ।
क्रिस्टल प्यालेसमाथि एभर्टनको जित
यस्तै, अर्को खेलमा एभर्टनले क्रिस्टल प्यालेसमाथि पुनरागमन जित निकालेको छ । ३७ औं मिनेटमा डानियल मुनोजले गोल गर्दै प्यालेसलाई सुरुवाती अग्रता दिलाएका थिए । तर, ७६ औं मिनेटमा इल्मान एन्डिएले पेनाल्टीमा गोल गर्दै एभर्टनलाई १–१ को बराबरीमा ल्याए । यस्तै, इन्जुरी समयमा ९०+३ औं मिनेटमा ज्याक ग्रिलिसले गोल गर्दै एभर्टनलाई जित दिलाए ।
एभर्टन ७ खेलबाट ११ अंकका साथ सातौं स्थानमा छ भने प्यालेस १२ अंकका साथ पाँचौं स्थानमा छ ।
