काठमाडौं । पूर्वराष्ट्रपति विद्यादेवी भण्डारीले युवालाई अध्ययन, संवाद र बहसका माध्यमबाट तथ्य तथा तर्कमा आधारित राजनीतिक धारणा निर्माण गर्न आग्रह गर्नुभएको छ ।
मदन भण्डारी आइडोलोजी स्टुडेण्ट फोरमले आइतबार आयोजना गरेको कार्यक्रममा बोल्दै उहाँले आफूभन्दा फरक विचार राख्ने व्यक्तिको विचारलाई समेत सम्मानपूर्वक सुन्ने संस्कार विकास गर्न युवालाई आग्रह गर्नुभएको हो ।
उहाँले लोकतन्त्रको शक्ति आफूले राखेको विचार मात्र स्थापित गर्नुमा नभई फरक मतलाई सम्मानपूर्वक सुन्ने र तथ्य तथा तर्कका आधारमा आफ्नो दृष्टिकोण निर्माण गर्ने संस्कारमा रहेको बताउनुभयो ।
“कुनै पनि राजनीतिक विचार समयसँगै विकसित हुँदै जानुपर्छ । त्यसैले तपाईंहरू आफ्नो जिज्ञासा राख्नुस्, अध्ययन गर्नुस्, आफ्ना विचार व्यक्त गर्नुस्, अरूका विचार पनि सुन्नुस् र संवाद तथा बहसबाट आफ्नो धारणा निर्माण गर्नुहोस्,” उहाँले भन्नुभयो ।
सामाजिक सञ्जाल, सूचना प्रविधि र विश्वव्यापी सम्पर्कका कारण आजको पुस्ता विगतका पुस्ताभन्दा बढी सूचनासम्पन्न भए पनि धेरै सूचना हुनु र सही ज्ञान हुनु फरक विषय भएको उहाँले बताउनुभयो । सूचनालाई तथ्यसँग, भावनालाई विवेकसँग र आलोचनालाई रचनात्मकतासँग जोड्ने क्षमता युवाका लागि आवश्यक रहेको उहाँको भनाइ थियो ।
पूर्वराष्ट्रपति भण्डारीले राजनीतिमा युवाको सहभागिता निर्वाचनका बेला मत माग्ने वा दिने कार्यमा मात्र सीमित हुन नहुने बताउनुभयो । समाज बुझ्ने, जनताको आवाज सुन्ने, नीति निर्माणमा भूमिका खोज्ने तथा देशको विकास र परिवर्तनमा रचनात्मक योगदान गर्ने निरन्तर प्रक्रियाका रूपमा युवाको राजनीतिक सहभागिता अघि बढ्नुपर्नेमा उहाँले जोड दिनुभयो ।
मदन भण्डारीको राजनीतिक यात्राबाट नयाँ पुस्ताले महत्वपूर्ण पाठ सिक्न सक्ने उल्लेख गर्दै उहाँले जनताको भावना, आकांक्षा र वास्तविकतालाई राजनीतिक विचारसँग जोड्ने प्रयास उहाँको राजनीतिक यात्राको महत्वपूर्ण पक्ष रहेको बताउनुभयो ।
“आज तपाईंहरूको पुस्ताले पनि आफ्नो समयका जनताको भावना, आकांक्षा र आवश्यकतालाई बुझ्दै देश र समाजलाई अघि बढाउने आफ्नो बाटो पहिल्याउनु आवश्यक छ,” उहाँले भन्नुभयो ।
उहाँले मदन भण्डारीका विचारलाई नयाँ पुस्ताले बदलिँदो समय र सामाजिक परिवेशसँग जोडेर अध्ययन तथा आत्मसात गर्नुपर्ने बताउनुभयो । लोकतन्त्रलाई थप प्रभावकारी र जनमुखी बनाउने, राज्यका संस्थालाई जवाफदेही तथा सक्षम बनाउने, राजनीतिमा युवाको सहभागिता र विश्वास बढाउने तथा शिक्षा र रोजगारीका अवसर विस्तार गर्ने विषयमा युवाले गम्भीर बहस गर्नुपर्ने उहाँको भनाइ थियो ।
देशमा परिवर्तनको अपेक्षा उच्च रहेको र युवामा नयाँ सोच तथा केही नयाँ गर्ने ऊर्जा रहेको उल्लेख गर्दै पूर्वराष्ट्रपति भण्डारीले उक्त ऊर्जा र उत्साहलाई देश तथा समाजको सकारात्मक परिवर्तनमा रूपान्तरण गर्नुपर्नेमा जोड दिनुभयो ।
उहाँले युवालाई लोकतन्त्रप्रति प्रतिबद्ध, सामाजिक न्यायप्रति संवेदनशील, राष्ट्रिय हितप्रति सचेत, अध्ययनशील र जिम्मेवार नागरिक बन्न आग्रह गर्नुभयो । नयाँ पुस्ताले नै देशको सुदृढ र उज्ज्वल भविष्य निर्माण गर्ने उहाँको भनाइ थियो ।
