काठमाडौं । नेपाली कम्युनिष्ट पार्टी (नेकपा)का नेता तथा पूर्वमन्त्री शक्तिबहादुर बस्नेतले नेपालको कम्युनिष्ट आन्दोलनको गम्भीर समीक्षा गर्न आवश्यक रहेको बताउनुभएको छ ।
आइतबार काठमाडौंमा आयोजित ‘वामपन्थी आन्दोलन अब के गर्ने ?’ विषयक राष्ट्रिय बहसमा बोल्दै उहाँले परिवर्तनको खोजीमा अघि बढेको जनमत कम्युनिष्ट दलहरूभन्दा टाढिँदै जानुको कारण पहिचान गर्नुपर्ने बताउनुभयो ।
बस्नेतले जनताको असन्तुष्टि र आवश्यकतालाई सम्बोधन गर्ने विचार, राजनीतिक संस्कृति र प्रणालीबारेको बहस कमजोर हुँदै जाँदा समस्याको समाधानको जिम्मेवारी व्यक्तिकेन्द्रित हुन थालेको टिप्पणी गर्नुभयो । उहाँका अनुसार कम्युनिष्ट पार्टीको सफलता र असफलताको श्रेय तथा जिम्मेवारी कुनै एक व्यक्तिलाई दिने वा एक व्यक्तिले मात्र लिने प्रवृत्तिले आन्दोलनलाई कमजोर बनाएको छ ।
उहाँले विश्वभर नवउदारवादको प्रभाव बढ्दै गए पनि त्यसले सामाजिक तथा आर्थिक असमानता र विभेद न्यूनीकरण गर्न नसकेको दाबी गर्नुभयो । पछिल्ला सामाजिक तथा प्राकृतिक घटनाक्रमको समाधान गर्न पनि नवउदारवादी व्यवस्थाले प्रभावकारी भूमिका खेल्न नसकेको उहाँको भनाइ थियो ।
विश्वको वर्तमान परिस्थितिले मुलुकलाई वामपन्थी वा दक्षिणपन्थीमध्ये कुनै एक बाटो रोज्नुपर्ने अवस्था सिर्जना गरिरहेको उल्लेख गर्दै बस्नेतले वामपन्थी आन्दोलनले जनताको असन्तुष्टि र आवश्यकतालाई नयाँ दिशा दिन विचार, राजनीति, संस्कृति र प्रणालीमाथि गम्भीर बहस गर्नुपर्ने बताउनुभयो ।
उहाँले भन्नुभयो, “परिवर्तनको खोजीमा हिँडेको जनअभिमत हामीबाट धेरै पर पुग्ने स्थिति किन र कसरी निर्माण भयो ? त्यसलाई सही दिशामा कसरी फर्काउन सकिन्छ ? आजको हाम्रो बहसको सार यहीँनेर आउनुपर्दछ ।”
बस्नेतले कम्युनिष्ट आन्दोलनलाई थप सशक्त बनाउन विगतका राजनीतिक अभ्यासहरूको मूल्याङ्कन गर्नुपर्नेमा जोड दिनुभयो । उहाँले २०६३ देखि २०८२ सालसम्म कम्युनिष्ट दलहरूले मुलुकको नेतृत्व गर्ने अवसर पाए पनि आम नागरिकलाई पर्याप्त रूपमा विश्वस्त बनाउन नसकेको टिप्पणी गर्नुभयो ।
कम्युनिष्ट आन्दोलनको पुनर्संरचना र सुदृढीकरणका लागि विगतका कमजोरीको समीक्षा गर्दै जनताको आवश्यकता र असन्तुष्टिलाई सम्बोधन गर्ने नयाँ विचार, राजनीतिक संस्कार र प्रणाली निर्माण गर्नुपर्ने उहाँको भनाइ थियो ।
