काठमाडौँ । भारतले पाकिस्तानलाई हराएर एशिया कपको उपाधि आफ्नो नाममा पारेको छ । भारतीय टिमले २०२३ मा एकदिवसीय प्रारूपको उपाधि जितेपछि २०२५ मा टी–२० प्रारूपको एशिया कप पनि जित्न सफल भएको हो । भारतका लागि तिलक वर्माले शानदार प्रदर्शन गर्दै अन्तिमसम्म टिकेर टिमलाई ऐतिहासिक जित दिलाए ।
भारतले टस जितेर पहिले बलिङ गर्ने निर्णय लिएको थियो । कुलदीप यादवको घातक बलिङको सहायताले भारतले पाकिस्तानलाई १९.१ ओभरमै १४६ रनमा समेट्यो । सो लक्ष्य पछ्याउने क्रममा तिलकले ५३ बलमा ३ चौका र ४ छक्कासहित अविजित ६९ रन बनाए र भारतले १९.४ ओभरमा ५ विकेटको क्षतिमा १५० रन पुरा गर्दै जित हासिल गर्यो।
रिंकूले हाने जितको चौका
भारतका लागि जित दिलाउने चौका रिंकू सिंहले हाने । रिंकूको चौका लाग्नेबित्तिकै भारतीय ड्रेसिङ रुम र मैदानमा रहेका दर्शक खुशीले झुमे । मुख्य प्रशिक्षक गौतम गम्भीरसमेत आफ्नो जोश नियन्त्रण गर्न सकेनन् । संघर्षपूर्ण पारी खेलेका तिलकले खुशीमा ब्याट हल्लाए भने पाकिस्तानका खेलाडीहरू फेरि निराश मुद्रामा मैदानमा उभिएका देखिए । यो पाकिस्तानविरुद्ध भारतको लगातार तेस्रो जित हो र सूर्यकुमार यादवको कप्तानीमा भारतले पाकिस्तानविरुद्ध जितको ह्याट्रिक पुरा गर्यो ।
भारतको कमजोर सुरुवात
लक्ष्य पछ्याउने क्रममा भारतले पावरप्लेभित्रै ३ विकेट गुमायो । अभिषेक शर्मा, शुभमन गिल र कप्तान सूर्यकुमार यादव जम्मा २० रनमै आउट भए । अभिषेकले यसअघि उत्कृष्ट प्रदर्शन गरेका थिए तर यस खेलमा ५ रनमा आउट भए । सूर्यकुमार फेरि असफल हुँदै १ रनमा आउट भए । त्यसपछि फहीम अशरफले शुभमन गिललाई आउट गर्दै भारतलाई थप दबाबमा पारे ।
तिलक र सामसनले सम्हाले पारी
शुरुवाती धक्का पाएको भारतलाई तिलक र सञ्जू सामसनले सम्हाले । दुवैले धैर्यपूर्वक खेल्दै चौथो विकेटका लागि ५७ रनको साझेदारी गरे । तर सामसन ठूलो शट खेल्ने प्रयासमा २४ रनमा आउट भए । उनले ठूलो योगदान नदिए पनि तिलकलाई साथ दिएको कुरा महत्वपूर्ण रह्यो ।
दुबेको आक्रामक खेल
भारत ७७ रनमा ४ विकेट गुमाइसकेको बेला शिवम दुबे मैदानमा आए । सुरुमा केही जोखिमपूर्ण शट खेले पनि पछि दुबेले आक्रामक शैलीमा खेल्दै दबाब कम गरे । तिलक र दुबेमाझ साझेदारी चलिरहेका बेला तिलकले अर्धशतक पुरा गरे । तर जब भारतलाई ७ बलमा १० रन चाहिएको थियो, दुबे २२ बलमा २ चौका र २ छक्कासहित ३३ रन बनाएर शाहीन अफरीदीद्वारा बाउन्ड्रीमा क्याच भए ।
अन्तिम ओभरको रोमाञ्च
भारतलाई अन्तिम ६ बलमा १० रन आवश्यक थियो । तिलकसँगै रिंकू सिंह क्रीजमा थिए । पाकिस्तानका लागि हारिस रऊफले अन्तिम ओभर बलिङ गरे । तिलकले पहिलो बलमा २ रन लिए र दोस्रो बलमा छक्का हाने । तेस्रो बलमा १ रन लिएर स्कोर बराबरी गरे । चौथो बलमा रिंकूले चौका प्रहार गर्दै भारतलाई जिताए । पाकिस्तानका लागि फहीम अशरफले ३ विकेट लिए भने शाहीन अफरीदी र अबरार अहमदले १–१ विकेट झारे ।
स्पिनरहरूको दम
पाकिस्तानले फाइनलमा भारतलाई १४७ रनको लक्ष्य दिएको थियो । भारतले पहिले बलिङ गर्दै पाकिस्तानलाई २० ओभर पनि पुरा गर्न नदिई १४६ रनमै समेट्यो । पाकिस्तानका सलामी ब्याट्सम्यान साहिबजादा फरहानले सर्वाधिक ५७ रन बनाए । उनले फखर जमाँसँगै राम्रो सुरुवात दिलाए र पावरप्लेमा भारतलाई सफलता दिलाएनन् । तर फरहानलाई वरुण चक्रवर्तीले आउट गरेपछि पाकिस्तानको ब्याटिङ धराशायी भयो ।
फखर जमाँले ४६ रन र सैम अयूबले १४ रन बनाए । शीर्ष तीन बाहेक अरू कुनै पनि पाकिस्तानी ब्याट्सम्यान दोहोरो अंकमा पुग्न सकेनन् । मोहम्मद हारिस, शाहीन अफरीदी र फहीम अशरफ त खाता नै खोल्न सकेनन् । कप्तान सलमान आगा ८, हुसैन तलत १, मोहम्मद नवाज ६ र हारिस रऊफ ६ रनमा आउट भए । अबरार अहमद १ रनमा अविजित रहे । भारतका लागि कुलदीप यादवले ४ विकेट लिए भने जसप्रीत बुम्राह, वरुण चक्रवर्ती र अक्षर पटेलले २–२ विकेट लिए ।
