रामायणको सुन्दरकाण्डको एउटा रमाइलो प्रसङ्ग छ । यस प्रसङ्गमा हनुमानजीले देखाउनुभएको छ — कुनै पनि ठूलो लक्ष्य हासिल गर्न केवल उत्साह मात्र होइन, बलियो आधार र योजनाबद्ध तयारी पनि अत्यावश्यक हुन्छ ।
देवी सीताको खोजीमा निस्किएको वानर सेनाले जब समुद्र किनार पुग्यो र थाहा पायो कि माता सीता लङ्कामा हुनुहुन्छ, तब ठूलो प्रश्न उठ्यो — सीताको खोजीमा लङ्का को जाने ?
सबैको नजर हनुमानजीतर्फ मोडियो । जिम्मेवारी पाउनासाथ हनुमानजीले ढिला नगरी लङ्का जाने तयारी सुरु गर्नुभयो । त्यसका लागि उहाँले एक विशेष काम गर्नुभयो — उहाँ एउटा स–सानो पहाडमा चढ्नुभयो, खुट्टाको दबाब जमाउनुभयो र त्यहाँबाट समुद्र पार गर्न विशाल फड्को मार्नुभयो ।
जब हनुमानजी देवी सीताको खोजी गरेर लङ्काबाट फर्किनुभयो, कसैले सोध्यो — “तपाईंले पहाडमा चढेर फड्को किन मार्नुभयो ? तपाईं त शक्तिशाली हुनुहुन्छ, जहाँ उभिनुहुन्थ्यो त्यहीँबाट पनि फड्को मार्न सक्नुहुन्थ्यो ।”
हनुमानजीले उत्तर दिनुभयो — “यदि फड्को लामो मार्नुपर्छ भने आधार बलियो हुनुपर्छ । आधार बलियो नहुने हो भने फड्को असफल हुन सक्छ । ठूलो सफलता चाहिन्छ भने आधार र योजनामा ध्यान दिनुपर्छ ।”
हनुमानजीको शिक्षा
हनुमानजीले देखाउनुभयो — कुनै पनि ठूलो काम, चाहे तपाईं कति सक्षम किन नहुनुहोस्, बलियो आधार बिना सुरु गर्नु हुँदैन ।
कुनै नयाँ परियोजना, परीक्षा, जागिर वा व्यवसाय सुरु गर्नु अघि पूर्ण तयारी र अनुसन्धान गर्नु जरुरी छ ।
योजना र सोच स्पष्ट हुनुपर्छ
हनुमानजीले पहिला परिस्थिति अवलोकन गर्नुभयो, पहाडको उचाइ बुझ्नुभयो, अनि त्यसमा चढेर फड्को मार्नुभयो । यसले देखाउँछ — सफलता केवल जोशले होइन, सोच र योजनाले प्राप्त हुन्छ ।
काम सुरु गर्नु अघि स्पष्ट कार्य–योजना बनाउनुपर्छ — के गर्ने, कहिले गर्ने, कसरी गर्ने ।
आत्मविश्वाससँगै आत्ममन्थन पनि आवश्यक
हनुमानजीसँग बल थियो, क्षमता थियो, तर उहाँले परिस्थिति जाँचेर मात्र कदम चाल्नुभयो । यसले सिकाउँछ — आत्मविश्वास राम्रो हो, तर अति–आत्मविश्वास खतरनाक हुन सक्छ ।
आफ्नो क्षमता मूल्याङ्कन गर्नुहोस्, र आवश्यक परे सिक्न वा सल्लाह लिन संकोच नगर्नुहोस् ।
सानो तयारी, ठूलो सफलता
पहाड चढ्ने उहाँको त्यो सानो कदम नै उहाँको विशाल सफलताको आधार बन्यो ।
सधैं स–साना तयारीलाई बेवास्ता नगर्नुहोस् — समयमै सुत्नु, पढाइको योजना बनाउनु, समय व्यवस्थापन गर्नु, वा अफिस बैठक अघि नोट तयार गर्नु ।
परिस्थितिको सही उपयोग गर्नुहोस्
हनुमानजीले प्रयोग गर्नुभएको पहाड त्यो स्रोतको प्रतीक हो, जुन हरेक मानिससँग हुन्छ । फरक केवल त्यसलाई पहिचान गरेर सही समयमा प्रयोग गर्नु हो ।
आफ्नो वरपरका अवसर, मानिस, समय र ज्ञानको स्मार्ट उपयोग गर्नुहोस् ।
जहाँ उभिनुभएको छ, त्यहीँबाट दौडिन नलाग्नुहोस् — पहिले जमिन हेरौं, आफूलाई हेरौं, अनि बलियो आधार बनाएर अगाडि बढौं । तपाईंको सफलताको फड्को तपाईंको आधारको मजबुतीमा निर्भर हुन्छ ।
