एजेन्सी । भारतीय क्रिकेट कन्ट्रोल बोर्ड (बीसीसीआई)को कुल बैंक ब्यालेन्स २०,६८६ करोड भारतीय रुपैयाँ पुगेको छ ।
समाचार संस्था पीटीआईको रिपोर्ट अनुसार, विगत ५ वर्षमा बोर्डले १४,६२७ करोड कमाएको छ ।
केवल आर्थिक वर्ष २०२३–२४ मा मात्रै बीसीसीआईले ४,१९३ करोड कमाएको हो । यो विवरण बोर्डले राज्य क्रिकेट संघहरूसँग साझेदारी गरिएको वित्तीय प्रतिवेदनमा उल्लेख गरिएको छ ।
बीसीसीआईको २०२४ मा सम्पन्न वार्षिक साधारणसभा (एजीएम)मा जानकारी दिँदै २०१९ मा रहेको ६,०५९ करोड रुपैयाँको क्यास तथा बैंक ब्यालेन्स बढेर हाल २०,६८६ करोड पुगेको उल्लेख गरिएको थियो ।
आर्थिक वर्ष २०२३–२४ का लागि बीसीसीआईले कर तिर्न ३,१५० करोड रुपैयाँ छुट्याएको छ m। यो विषय अदालत र ट्रिब्युनलमा विचाराधीन भए पनि भविष्यमा तिर्नुपर्ने सम्भावनालाई ध्यानमा राख्दै रकम सुरक्षित राखिएको हो ।
अन्तर्राष्ट्रिय क्रिकेट र मिडिया अधिकारबाट आम्दानी घट्यो
२०२३–२४ मा पुरुष अन्तर्राष्ट्रिय क्रिकेट प्रतियोगिताबाट आम्दानी ३६१.२२ करोड रुपैयाँ मात्र रह्यो, जुन अघिल्लो वर्षको ६४२.७८ करोडभन्दा कम हो ।
मिडिया अधिकारबाट हुने आम्दानी पनि २,५२४.८० करोडबाट घटेर ८१३.१४ करोडमा झर्यो । यसमा अन्तर्राष्ट्रिय खेलको संख्या घट्नु र २०२३ को विश्वकप आयोजनाको प्रभाव रहेको बोर्डले जनाएको छ ।
आइपीएल र आईसीसीबाट बढ्यो मुनाफा
आइपीएलबाट भएको कमाइ र आईसीसीबाट प्राप्त अंशका कारण बीसीसीआईलाई २०२३–२४ मा १,६२३.०८ करोड रुपैयाँ नाफा भयो । अघिल्लो वर्ष यो १,१६७.९९ करोड रुपैयाँ थियो ।
आइपीएलबाट बीसीसीआई कसरी कमाउँछ ?
मिडिया राइट्सः खेलको प्रत्यक्ष प्रशारण र हाइलाइट्स प्रसारण अधिकारबाट सबैभन्दा बढी आम्दानी हुन्छ ।
टाइटल स्पोन्सरशिपः २००८ मा वार्षिक ५० करोडमा टाइटल स्पोन्सरशिप सुरु भएकोमा २०२३ मा यो ३०० करोड नाघेको छ । टाटासँग दुई वर्षे सम्झौतामा ६०० करोड प्राप्त भएको थियो ।
फ्रेन्चाइज शुल्कः नयाँ टोली सहभागी हुँदा बोली प्रक्रियामार्फत ठूलो रकम बोर्डले प्राप्त गर्छ । २०२२ मा गुजरात टाइटन्स र लखनऊ सुपरजायन्ट्स सहभागी हुँदा मात्रै बीसीसीआईको खातामा १२,५०० करोड जोडिएको थियो ।
ब्याज आम्दानीमा वृद्धि
बैंकमा रहेको निक्षेपबाट बीसीसीआईले ९८६.४५ करोड ब्याज आम्दानी गरेको छ । अघिल्लो वर्ष यो ५३३.०५ करोड मात्र थियो ।
बीसीसीआईले २०२३–२४ मा राज्य क्रिकेट संघका लागि १,९९०.१८ करोड रुपैयाँ विनियोजन गरेको थियो भने २०२४–२५ का लागि २,०१३.९७ करोड छुट्याइएको छ । यसका अतिरिक्त पूर्वाधार विकासका लागि १,२०० करोड, प्लाटिनम जुबिली बेनेभोलन्ट फन्डका लागि ३५० करोड र क्रिकेट विकासका लागि ५०० करोड विनियोजन गरिएको छ ।
