एजेन्सी । प्रिमियर लिग क्लबहरूले यसपटकको ट्रान्सफर विन्डोमा अहिलेसम्मकै धेरै खर्च गरेका छन् । जसअन्तर्गत यस समरमा खर्च ३ अर्ब पाउण्ड (३.०८७ अर्ब) नाघेको छ ।
३१ अगस्टसम्ममा २.७३ अर्ब खर्च भइसकेको थियो । तर अन्तिम दिन (डेडलाइन डे)मा ठूला सम्झौताहरू भए । विशेषगरी एलेक्जान्डर इसाकको न्युक्यासलबाट लिभरपुल जाने ब्रिटिश कीर्तिमान १२५ मिलियन पाउण्डको ट्रान्सफरपछि कुल खर्च ३.०८७ अर्ब पुगेको हो ।
यो अघिल्लो वर्षको तुलनामा धेरै हो, जब शीर्ष श्रेणीका क्लबहरूले जम्मा १.९६ अर्ब मात्र खर्च गरेका थिए ।
यस वर्षको खर्च जर्मनीको बुन्डेसलिगा, स्पेनको ला लिगा, फ्रान्सको लिग १ र इटालीको सिरी ए का सबै क्लबहरूले खर्च गरेको भन्दा बढी हो ।
डेडलाइन डे का प्रमुख सम्झौताहरू
अन्तिम दिन सामान्यतया खेलाडी स्थानन्तरणका लागि शान्त देखिएको थियो, किनभने प्रमुख सम्झौता बेलुकी ७ बजे विन्डो बन्द भएपछि मात्र सार्वजनिक भए ।
सम्झौताको कागज समयमै बुझाइएमा त्यसपछि दुई घण्टा भित्र पनि डिल पूरा गर्न सकिने सुविधा थियो ।
स्विडिस स्ट्राइकर इसाकको स्थानान्तरण राति ९ः३० बजे पुष्टि भएको थियो । तर इङ्ल्यान्ड डिफेन्डर मार्क गीहीको अपेक्षित स्थानान्तरण भने असफल भयो, किनभने क्रिस्टल प्यालेसले आफ्ना कप्तानको विकल्प ल्याउन नसक्दा डिल रोकिदियो ।
इसाकको प्रस्थानको घोषणापछि न्युक्यासलले ब्रेन्टफोर्डबाट योआने विस्सालाई ५५ मिलियनमा अनुबन्ध गरेको घोषणा गर्यो ।
अन्य चर्चित सम्झौताहरूः
फुलह्यामले शख्तर डोनेत्स्कका ब्राजिलियन विङ्गर केभिनलाई क्लब–रेकर्ड ३४.६ मिलियनमा अनुबन्ध गर्यो ।
म्यानचेस्टर युनाइटेडले रोयल एन्ट्वर्पबाट बेल्जियन गोलकिपर सेन्ने लामेन्सलाई सुरुवाती १८.१ मिलियनमा भित्र्यायो ।
रेड डेविल्स फर्वार्ड जाडोन सान्चो एस्टन भिल्लामा एक सिजनका लागि गए, जसले लिभरपुल मिडफिल्डर हार्भी इलियटलाई पनि ‘खरिद विकल्प’ सहित लोनमा ल्यायो ।
टोटनह्यामले पेरिस सेन्ट–जर्मेनका स्ट्राइकर रान्डल कोलो मुआनीलाई एक सिजनका लागि लोनमा अनुबन्ध गर्यो ।
आर्सनलले बायर लेभरकुसेनका डिफेन्डर पिएरो हिंकापीलाई लोनमा भित्र्यायो ।
शीर्ष लिगमा बढुवा भएको सनडरल्यान्डले खर्चिलो अभियानलाई निरन्तरता दिँदै एयाक्सका फर्वार्ड ब्रायन ब्रोबे र बर्ट्रान्ड ट्राओरेलाई, साथै आरबी लाइपजिगका डिफेन्डर लुटसरेल गेरट्रुइडालाई एक सिजनका लागि लोनमा अनुबन्ध गर्यो ।
