एजेन्सी । आईपीएल टोलि रोयल च्यालेन्जर्स बैंगलोर (आरसीबी)ले विजय समारोहका क्रममा भागदौडमा ज्यान गुमाएका फ्यानहरूको सम्झनामा स्मारक (मेमोरियल) निर्माण गर्ने भएको छ ।
यसमा आरसीबीका सबैभन्दा उत्साही फ्यानहरूको नाम, उनीहरूको कथा र उनीहरूसँग जोडिएका सामग्रीहरू सुरक्षित राखिनेछ ।
फ्रेन्चाइजले यो घोषणा सोमबार आफ्नो ६ बुँदे घोषणापत्र (म्यानिफेस्टो) मार्फत गरेको हो । ‘आरसीबी केयर्स’ नाम दिइएको यस पहलअन्तर्गत भनिएको छ– “फ्रेन्चाइज अब केवल आर्थिक सहयोगमा सीमित रहने छैन, प्रभावित परिवारहरू र फ्यानहरूको सम्झनालाई जीवित राख्न ठोस कदम चाल्नेछ ।”
२ दिनअघि मात्र आरसीबीले दुर्घटनामा ज्यान गुमाउने प्रत्येक परिवारलाई २५–२५ लाख रुपैयाँ आर्थिक सहयोग दिने घोषणा गरेको थियो ।
पहिलो पटक आईपीएल जितेपछि आरसीबीले जुन ४ मा बैंगलोरमा विजय यात्राको आयोजना गरेको थियो । सो यात्राको क्रममा एम चिन्नास्वामी रंगशालाबाहिर भागदौड मच्चिँदा ११ जनाको मृत्यु भएको थियो भने ५० भन्दा बढी घाइते भएका थिए ।
ज्यान गुमाउने सबै जना ३५ वर्षभन्दा कम उमेरका थिए । सबैभन्दा सानी पीडित १३ वर्षीया दिव्यांशी थिइन् । मृत्यु हुनेमध्ये तीन जना किशोर र छ जना युवाको उमेर २० देखि ३० वर्षबीच थियो ।
