काठमाडौं । पछिल्ला केही वर्षयता तीजको रौनक स्वदेशमात्र सिमित छैन, नेपालीहरुको बसोबास भएका विश्वका एक सय भन्दा बढी देशहरुमा पनि तीज धूमधामका साथ मनाउन थालिएको छ ।
अहिले त नेपालबाट नाम चलेका कलाकारहरुलाई बोलाएर विदेशमै तीज विशेष कार्यक्रम आयोजना गर्ने चलननै चलेको छ । यो वर्ष पनि अधिकांश तीज गीतका गायिकाहरु तीज विशेष कार्यक्रममा सहभागिता जनाउन यूरोप, अमेरिकादेखि अष्ट्रेलियासम्म पुगेका छन् ।
यसै क्रममा अमेरिका बिभिन्न सहरमा सांगितिक यात्रामा रहेका कलाकार बद्रि पंगेनी , प्रताप दाश , एलिना चौहान , कला लम्साल लगायतका कलाकारहरुले न्यूयोर्कको नायग्रा फल्स बरपर रहेका नेपाली माझ तीज मनाएका छन् ।
नायग्रा फल्स नजिकै रहेको द लुक्ला हिमालयन एण्ड साउथ इण्डियन किचनमा आयोजना गरिएको कार्यक्रममा उल्लेख्य संख्यामा उपस्थित नेपालीहरु माझ कलाकारहरुले आफनो प्रस्तुती दिदै नचाएका थिए । कार्यक्रममा विविध सांस्कृतिक एवं मनोरञ्जनात्मक कार्यक्रम प्रस्तुत गरिएको थियो ।
कार्यक्रमको संयोजन गर्नुभएका मध्येका एक लोकनाथ अधिकारीका अनुसार तीजका कारण यस क्षेत्रमा बसोबास गरिरहेका नेपाली एकै ठाउँमा जम्मा भएर निकै रमाईलो गर्ने अबसर जुटेको बताउनु भयो ।
उहाँले भन्नुभयो, “विदेशमा रहँदा यस्ता चाडपर्वले नेपालीहरूको आपसी सद्भावना र भाइचारा बढाउने गरेको छ । साथै नयाँ पुस्तालाई हाम्रो कला संस्कृति र संस्कार बुझाउने माध्यम पनि भएको छ ।”
कार्यक्रममा सहभागी भएकाहरुले सामुहिक रुपमा भेला भएर तीज मनाउँदा अमेरिकामा पनि माइतीको न्यास्रो मेटिएको अनूभूति गरेको बताए ।
