काठमाडौँ । नागरिक उन्मुक्ति पार्टी (नाउपा)का संरक्षक रेशम चौधरीले निर्वाचन प्रायोजनका लागि दल दर्ता नहुनुमा आफ्नो कमजोरी नभएको बताएका छन् । मंगलबार सामजिक सञ्जालमार्फत चौधरीले आफू अध्यक्ष नभएकाले त्यसमा आफ्नो कमजोरी नभएको प्रस्ट पारेका हुन् ।
उनले भनेका छन्, ‘निर्वाचन प्रायोजनको लागि दल दर्ता नहुनु मेरो कमजोरी होइन । म अध्यक्ष हो र ? केन्द्रीय समितिको बैठक बसाएर निर्णय बुझाए भैहाल्थ्यो त । न केन्द्रीय समितिको बैठक बसाउने, न लेखापरीक्षण गराउने, न पार्टीलाई चलायमान बनाउने ? अनि दोष जति मेरो थाप्लोमा थुपारेर आफू चोखो बन्ने ? अहिलेपनि तुरुन्त केन्द्रीय समितिको बैठक बोलाए भैहाल्यो नि । बाँकी मनोनीत साथीहरूलाई अद्यावधिक गराइदिनु, टण्टै साफ ।’
यस्तै, उनले दुश्मनको सल्लाहमा लागेर युद्ध कहिल्यै नजितिने जिकिर समेत गरेका छन् । उनले अगाडि भनेका छन्, ‘दुश्मनको सल्लाहमा लागेर युद्ध कहिल्यै जितिन्न । हामी सहयोगी मात्रै होइन, सहयोद्धा पनि हौं । रह्यो कुरा रुपन्देहीको । हाम्रो उम्मेदवार उठ्छ । म राजनैतिक व्यक्ति हो । यही सातादेखि प्रचारप्रसारमा खटिन रुपन्देही आउँछु । समस्या चर्काउन तिर होइन, समाधान तिर लागौं । पार्टी विभाजनका सहयोगीलाई दलबाट मात्रै होइन, समूहबाटै बहिष्कार गरौं ।’
केही दिनअघि रेशम पक्षले पार्टी अध्यक्ष रञ्जिता श्रेष्ठलाई हटाएर उनका पिता लालबीर चौधरीलाई अध्यक्ष बनाएको थियो । तर भेला अवैधानिक भन्दै निर्वाचन आयोगले उक्त निर्णयलाई मान्यता दिएन ।
