काठमाडौं । महामारीका कारण सबैजना घरभित्रै लकडाउन भएपछि पहिलोपटक अनलाइनमार्फत् तेक्वान्दो प्रतियोगिता फ्रान्समा भई रहेको छ। प्रदर्शनमा आधारित रहेर मूल्यांकन हुने यो प्रतियोगितामा नेपालका सात जना खेलाडीहरु सहभागीता जनाएका छन्।
विश्वव्यापी महामारी कोभिड–१९ का कारण विश्वभर खेलकुद गतिविधि बन्द रहेको अवस्थामा त्यसको असर नेपालमा पनि परेको छ । नेपालमा पनि सबै खेलकुद गतिविधिहरु स्थगित गरिएका छन् । यस्तो महामारीका बीच पनि सात जना नेपाली खेलाडीहरुले अन्तर्राष्ट्रिय प्रतियोगितामा सहभागिता जनाएका छन ।
नेपाल सरकारले तोकेको मापदण्ड बमोजिम भौतिक दूरी कायम गरेर मात्र जोगिन सक्ने रोगको महामारीको समयमा पनि सात जना तेक्वान्दो खेलाडीले फ्रान्समा भई रहेको उक्त प्रतियोगितामा भाग लिएका हुन्।
एकातिर तेक्वान्दो जस्तो विधा छ र अर्कोतिर राष्ट्रिय तथा अन्तर्राष्ट्रिय उडान ठप्प छ। यस्तो बेला उनीहरूले तेक्वान्दो प्रतियोगितामा भाग लिन कसरी सम्भव भयो त ? कसरी भने यो प्रतियोगिता प्रत्यक्ष होइन, अनलाइनमा हुँदैछ।
“तेक्वान्दोको पुम्से विधामा ‘फिजिकल कन्ट्याक्ट’ हुँदैन। तेक्वान्दोको ग्यारुगी विधामा भने ‘फिजिकल कन्ट्याक्ट’ हुन्छ। पुम्सेमा आफ्नो प्रतिभा प्रदर्शन गर्ने हो। त्यसकारण यो खेल अनलाइन गराउन सम्भव भयो,” तेक्वान्दोका प्रशिक्षक दीपक विष्टले देखापढीसँग भने, “लकडाउनमा पनि खेलाडीलाई व्यस्त राख्न विश्व तेक्वान्दो महासंघ, युरोपले यो प्रतियोगिता आयोजना गरेको हो।’’
जर्मनीमा हुने ‘२०२० अनलाइन पुम्से विश्व च्याम्पियनसिप’ नाम दिइएको यस प्रतियोगितामा नेपालबाट दुई महिला र पाँच पुरूषसहित सात खेलाडीले प्रतिस्पर्धा गरेका थिए । लक्ष्मणबहादुर ऐर, कमल श्रेष्ठ, सुरेन्द्र बहादुर महरा, जीत बहादुर बोटे, सिता तामाङ, प्रेम बहादुर लिम्बु र पार्वती गुरुङले उक्त प्रतियोगितामा भाग लिएका हुन्।
प्रतियोगितामा सहभागी लक्ष्मणबहादुरले ५० वर्ष मुनिको विधामा प्रतिस्पर्धा गर्नेछन् भने अरूले ३० वर्ष मुनिको विधामा प्रतिस्पर्धा गर्नेछन्।
पार्वती र कमल १३ औं दक्षिण एशियाली खेलकुद ९साग०का स्वर्ण पदक विजेता हुन्। त्यस्तै जीतबहादुर र प्रेमबहादुर पनि १३ औं सागका पदकधारी खेलाडी हुन ।
प्रतियोगितामा २७ देशका खेलाडीहरुले प्रतिस्पर्धा गरेको टिम प्रशिक्षक एव खेलाडी लक्ष्मणबहादुर ऐरले बताए। प्रतियोगिता २२ वैशाखबाट शुरू भए पनि नेपाली खेलाडीको प्रदर्शन २६ र २७ वैशाखमा हुने लक्ष्मणबहादुरले बताए। ३० बर्ष मुनिको खेलमा नेपालका राष्ट्रिय खेलाडी एवं सागका स्वर्ण पदकधारी कमल श्रेष्ठले स्वर्ण पदक प्राप्त गरेका छन भने सोही उमेर समुहमा जित बहादुर बोटे रजत, पार्वती गुरुङ रजत र प्रेम बहादुर लिम्बु कास्य पदक प्राप्त गर्न सफल भएका छन । साथै ५० वर्षमुनि उमेर समूहका लक्ष्मण बहादुर ऐरको प्रतिस्पर्धा ०१ जेष्टमा हुदैछ ।
कसरी हुन्छ प्रतिस्पर्धा ?
यस प्रतियोगितामा खेलाडी दर्ता, खेलाडीको प्रदर्शनदेखि नतिजा प्रकाशनसम्म अनलाइन मार्फत् भई रहेको छ । सम्पूर्ण खेलाडीहरुको दुइ वटा पुम्से भिडियोको यु ट्यूव लिंक, खेलाडी दर्ता रसीद र अन्य विवरणहरु सवैको व्यवस्थापन टोली प्रशिक्षक एवं खेलाडी लक्षमण स्वयंले तेक्वान्दो संघका सचिव दिपक बिष्टसँग समन्वय गरी गरेका थिए ।
लक्ष्मणले विदेशमा बस्ने साथीहरूमार्फत् प्रतियोगिताको बारेमा जानकारी पाएको बताए। यस्तो प्रतियोगिता हुँदैछ भन्ने थाहा पाएपछि कोरियाली प्रशिक्षक क्वान योङ र ओलम्पियन दीपक विष्टसँगको सल्लाहमा सहभागिता जनाएको उनले बताए।
“प्रतियोगितामा सहभागिताका लागि प्रतिव्यक्ति १० युरो फ्रान्सको बैंकमा जम्मा गर्नुपर्ने थियो। त्यसमा अलि समस्या भयो। पछि हामीले विदेशमा बस्ने साथीमार्फत् जम्मा ग¥यौँ,” लक्ष्मणबहादुरले भने, “यो प्रतियोगितामा सहभागी भई आफ्नो देशलाई चिनाउन पाउँदा हामी एकदम खुशी छौँ।” प्रतियोगतामा भाग लिनका लागि पाँच खेलाडीले सामाजिक दूरीको नियमलाई पालना गर्दै दैनिक चार घण्टा प्रशिक्षण गरिरहेको लक्ष्मणले बताए।
“हामीले शुरूबाटै बिहान र बेलुका दुई–दुई घण्टा नियमित प्रशिक्षण गर्दै आएका छौँ,” लक्ष्मणले भने, “लकडाउन भए पनि हाम्रो प्रशिक्षण टुटेको छैन। उनले भने, “यसरी अनलाइनमार्फत् प्रतियोगिता गरिएको यो नेपालको दोस्रो खेल हो । विश्व तेक्वान्दोकै सम्बन्धन रहेको यस प्रतियोगितामा नेपाली खेलाडीको सहभागिता हुनु खुशीको कुरा हो। यसले नेपाल पनि प्राविधिक रूपमा अन्य देशभन्दा कुनै पनि हिसाबले कमजोर नरहेको सन्देश दिएको छ।”
