काठमाडौँ। राष्ट्रिय परीक्षा बोर्डले कक्षा १२ को परीक्षाफल सार्वजनिक गरेको छ। सार्वजनिक नतिजा अनुसार, कुल ६१.१७ प्रतिशत विद्यार्थीले ग्रेड प्राप्त गर्दै परीक्षा उत्तीर्ण गरेका छन् भने बाँकी ३८.८३ प्रतिशतले कुनै ग्रेड प्राप्त गर्न सकेनन्।
गत वैशाख २१ गतेदेखि सञ्चालन भएको परीक्षामा पाँच लाख १० हजार ९८७ विद्यार्थी सहभागी भएका थिए। तीमध्ये तीन लाख ९६ हजार ३४७ जना नियमित र एक लाख १४ हजार ६४० जना आंशिक परीक्षार्थी थिए।
बोर्डले दिएको जानकारीअनुसार, नियमिततर्फ दुई लाख ४२ हजार ४६५ र आंशिकतर्फ ४१ हजार ८४० जनाले ग्रेड प्राप्त गरेका छन्। सबैभन्दा बढी विद्यार्थीले बी प्लस ग्रेड (जीपीए २.८१–३.२०) प्राप्त गरेका छन्।
ग्रेड अनुसार परीक्षार्थीको विवरण यसप्रकार छः
ए प्लस (३.६५–४.००) — १३,५०२ जना
ए (३.२१–३.६५) — ५५,८९६ जना
बी प्लस (२.८१–३.२०) — ९४,२६८ जना
बी (२.४१–२.८०) — ६९,८१२ जना
सी प्लस (२.०१–२.४०) — ८,९६४ जना
सी (१.६१–२.००) — २३ जना
यसपटक १७ परीक्षार्थीको परीक्षा रद्द गरिएको छ। साथै, पूरक परीक्षा आगामी भदौ २८ र २९ गते सञ्चालन गरिने बोर्डले जनाएको छ।
परीक्षा नियन्त्रक कृष्णप्रसाद शर्माका अनुसार, यसपटकको नतिजा गत वर्षको तुलनामा ९ प्रतिशतले सुधार भएको हो। उनका अनुसार पढाइको स्तर, परीक्षाको तयारी र प्रणाली सुधारसँगै परिणाम पनि सन्तोषजनक देखिएको छ। शर्मा भन्छन्, “कक्षा १२ को नतिजा एसईईजस्तै सुधारोन्मुख र उत्साहजनक छ।”
