नयाँदिल्ली । लद्दाख क्षेत्रमा सोमबार भएको हिंसात्मक झडपपछि सिर्जित तनाव कम गर्न भारत र चीनबीच बिहीबार भएको मेजर जर्नेल तहको वार्ता सकारात्मक रहेको भारतीय सञ्चारमाध्यमहरूले जनाएका छन् । यो वार्ता बुधबार पनि भएको थियो । तर, बुधबारको तीन घण्टा लामो वार्ता बिनाकुनै सहमति टुंगिएको थियो । त्यसपछि बिहीबार फेरि दुवै पक्ष वार्तामा बसेका थिए । बिहीबारको वार्ता भने सकारात्मक दिशामा अघि बढेको सैनिक स्रोतलाई उद्धृत गर्दै भारतीय सञ्चारमाध्यमहरूले जनाएका छन् । सोमबारको घटनापछि भारतमा चिनियाँ उत्पादन र लगानी बहिष्कार गर्नुपर्ने माग चर्को रूपमा उठेको छ । बिहीबार मात्र भारतीय रेलवेले चिनियाँ कम्पनीले पाइसकेको भारु ४७१ करोडको ठेक्का तोड्ने निर्णय गरेको छ ।
बुधबार भारतको केन्द्र सरकारले मोबाइल सेवा प्रदाय कम्पनी भारतीय सञ्चार निगम (बीएसएनएल) लाई फोरजी प्रविधि जडानका लागि चिनियाँ उपकरण उपयोग नगर्न निर्देशन दिएको थियो । बीएसएनएल भारत सरकारको स्वामित्व भएको कम्पनी हो । पूर्वी लद्दाखको गलवान उपत्यकामा सोमबार करिब पाँच घण्टासम्म भारतीय र चिनियाँ सैनिकबीच भएको झडपमा परी एक अधिकृतसहित बीस भारतीय सैनिकको ज्यान गएको थियो । भारतीय पक्षले झडपमा चीनतर्फ पनि ठूलो संख्यामा हताहत भएको दाबी गरे पनि त्यसको पुष्टि भएको छैन । केही अन्तर्राष्ट्रिय सञ्चारमाध्यमहरूले पनि दुवैतर्फ ठूलो संख्यामा मानवीय क्षतिको उल्लेख गरेका थिए ।
तर, त्यसको दुई दिनपछि दुवै पक्षले राजनीतिक र सैन्य तहमा संवादलाई अगाडि बढाएका छन् । बुधबार भारतीय विदेशमन्त्री एस जयशंकरले चिनियाँ समकक्षी वाङ यीसँग पनि टेलिफोन कुराकानी गरेका थिए । दुवै पक्षले टेलिफोन कुराकानी घटनालाई लिएर एकअर्कालाई दोषारोपण गरेका थिए । त्यसैगरी मेजरल जनरल तहको वार्तालाई सुरु गरिएको थियो । तर, उक्त वार्ता बिनानिष्कर्ष टुंगिएको थियो । यसैबीच लद्दाख घटनामा भारतीय सेनातर्फ भएको मानवीय क्षतिलाई लिएर राजनीतिक दलहरूबीच आरोपप्रत्यारोप सुरु भएको छ । विपक्षी भारतीय राष्ट्रिय कंग्रेसका पूर्वअध्यक्ष राहुल गान्धीले भारतीय सैनिकको ज्यान जानुमा लापरबाही भएको भन्दै सरकारको आलोचना गरेका छन् ।
उनले बिहीबार ट्वीटरमा एउटा भिडियोमार्फत बिनाहतियार ड्युटीमा खटाइएका कारण भारतीय सैनिकहरूको ज्यान गएको दाबी गरेका छन् । विदेशमन्त्री एस जयशंकरले त्यसको जवाफमा ट्वीटमार्फत ड्युटीमा खटिएका सैनिकहरू सधैँ हतियारले सुसज्जित रहने हुँदा तथ्यमा आधारित हुन गान्धीलाई भनेका छन् । कान्तिपुर दैनिक
