काठमाडौं । वैज्ञानिक वनका नाममा अनियन्त्रीत रुपमा वन फडानी भइरहेको भन्दै सांसदहरुले चिन्ता व्यक्त गरेका छन् ।
सार्वजनिक लेखा समितिमा भएको छलफलमा सांसदहरुले वैज्ञानिक वन व्यवस्थापनका नाममा अनियन्त्रित तरिकाले फडानी भइरहेको भन्दै चिन्ता व्यक्त गरेका हुन् । सांसद प्रेम आलेले वैज्ञानिक वनका नाममा अनियन्त्रित फडानी र ठूलो घोटाला भएको बताउनुभयो । स्थानीयसँगको सहकार्य बिना नै सामुदायिक वनका अध्यक्ष र वनका कर्मचारीहरुले वैज्ञानिक वनको नाममा अनियन्त्रित रुपमा फडानी गरिरहेको उहाँले बताउनुभयो । संघबाट नै यसलाई नियन्त्रण गरी दोषिलाई कारवाही गर्न उहाँले आग्रह गर्नुभयो ।
सांसद प्रदीप यादवले राज्य, नेता र वनका कर्मचारीहरुको मिलेमतोमा वैज्ञानिक वनको नाममा धमाधम काँचा काठहरु कटान भइरहेकाले यसलाई नियन्त्रण गर्नुपर्ने बताउनुभयो ।
सांसद मोहम्मद इस्तियाक राईले बाँकेमा ६५ हजार क्यूफिट काठ काट्ने भनिएपनि १ लाख ५० हजार क्यूफिट बढी रुखहरु कटान गर्ने अनुमति किन दिइयो भन्दै प्रश्न गर्नुभयो । विदेशबाट काट आयात रोक्ने नाममा देशभित्रका सबै वनहरु फडानी गर्ने कस्तो वैज्ञानिक वन हो ? उहाँले भन्नुभयो ।
वन तथा वातावरण मन्त्रालयका सचिव विश्वनाथ ओलीले देशभरी रहेको कुल २२ लाख, ७२ हजार हेक्टर वन मध्ये १ लाख ७५ हजार ३ सय २१ हेक्टर वन क्षेत्र मात्रै वैज्ञानिक वन व्यवस्थापनका रुपमा रहेको बताउनुभयो । २२ हजार ४ सय १५ सामुदायिक वनमध्ये ७ सय ५० वटा वनमा मात्रै वैज्ञानिक वन व्यवस्थापन लागु भएको बताउनुभयो ।
समितिले लक डाउनको मौका छोपी वैज्ञानिक वन वयवस्थापनका नाममा फडानीका घटना बढिरहेको भन्दै छानबिन समिति गठन गरेको छ । सांसद प्रदीप यादवको संयोजकत्वमा तीन सदस्य रहेको समिति गठन भएको हो । समितिमा प्रेम बहादुर आले र मिना सुब्बा सदस्य रहेका छन् । समितिले वैज्ञानिक वन तथा व्यवस्थापनको नाममा भइरहेको फडानीको अध्ययन गर्ने छ ।
