काठमाडौँ । नेकपा (एमाले) ले आमनिर्वाचनमा पार्टीले व्यहोरेको पराजयको समीक्षा गर्दै पार्टी पुनर्जागरण, वैचारिक तथा सांगठनिक रूपान्तरण र आगामी निर्वाचनको तयारीलाई प्राथमिकतामा राख्ने निर्णय गरेको छ ।
ललितपुरको रामबाग पार्टी प्यालेसमा अध्यक्ष केपी शर्मा ओलीको अध्यक्षतामा सम्पन्न पार्टीको तेस्रो केन्द्रीय कमिटी बैठकले अध्यक्ष ओलीद्वारा प्रस्तुत राजनीतिक प्रतिवेदन पारित गर्दै ‘अन्तरपार्टी निर्देशन–३’ (अपानी–३) जारी गरेको हो ।
बैठकले निर्वाचन परिणामको नैतिक जिम्मेवारी अध्यक्ष ओलीले स्वीकार गर्नुभएको उल्लेख गर्दै संकटको समयमा मैदान छाडेर नभाग्ने र एमालेलाई पुनः प्रमुख राजनीतिक शक्तिका रूपमा स्थापित गर्ने प्रतिबद्धता व्यक्त गरिएको जनाएको छ ।
एमालेले निर्वाचनमा पराजय हुनुका चार प्रमुख कारण पहिचान गरेको छ । बाह्य राजनीतिक आक्रमण, भूराजनीतिक स्वार्थ, डिजिटल माध्यमबाट भएको चरित्रहत्या तथा भ्रमपूर्ण प्रचारलाई पहिलो कारणका रूपमा औँल्याइएको छ । त्यस्तै बेरोजगारी, महँगी, भ्रष्टाचार र सेवा प्रवाहमा देखिएको कमजोरीलाई संरचनात्मक असन्तोषका रूपमा विश्लेषण गरिएको छ ।
पार्टीभित्रको जनतासँगको दूरी, युवासँगको संवादको कमी, सांगठनिक सुस्तता र सञ्चार क्षेत्रमा देखिएको कमजोरीलाई आन्तरिक कमजोरीका रूपमा उल्लेख गरिएको छ । नयाँ शक्तिप्रतिको आकर्षण, भावनात्मक लहर र पुराना दललाई सजाय दिने मनोविज्ञानलाई पनि निर्वाचन परिणाम प्रभावित गर्ने कारणका रूपमा एमालेले विश्लेषण गरेको छ ।
बैठकले पार्टीमा रूपान्तरण, हस्तान्तरण र पुस्तान्तरणलाई प्राथमिकतामा राख्ने नीति अघि सारेको छ । इतिहास र बलिदानको जगमा उभिएर कार्यशैली, भाषा, प्रविधि र निर्णय प्रक्रियामा समयानुकूल परिवर्तन गर्ने बताउँदै नेतृत्व हस्तान्तरण विधि, परिपक्वता र प्रक्रियाका आधारमा हुनुपर्नेमा जोड दिइएको छ ।
त्यस्तै पुरानो र नयाँ पुस्ताबीच द्वन्द्व सिर्जना गर्नुको सट्टा अनुभव, प्रविधि र ऊर्जाको संयोजन गर्दै तीन पुस्ताबीचको एकता कायम गर्ने नीति लिइएको छ ।
एमालेले तत्कालका लागि दुई प्रमुख कार्यभारसमेत तय गरेको छ । संविधान र लोकतान्त्रिक प्रणालीको रक्षा गर्दै न्यायपालिका, संसद्, नागरिक अधिकार तथा संघीय संरचनाको संरक्षण गर्ने र आगामी स्थानीय तथा प्रदेश सभा निर्वाचनको तयारीमा जुट्ने निर्णय गरिएको छ । त्यसका लागि ‘मिसन पार्टी जागरण’ अभियान सञ्चालन गर्ने उल्लेख छ ।
पार्टी सुदृढीकरणका लागि सत्य संवाद तथा घरदैलो अभियान सञ्चालन गर्ने, महँगी, बेरोजगारी र जनजीविकाका सवालमा केन्द्रित हुँदै रचनात्मक प्रतिपक्षको भूमिका निर्वाह गर्ने निर्णय पनि बैठकले गरेको छ ।
एमालेले डिजिटल माध्यमबाट हुने प्रचार तथा भ्रमको प्रतिवाद गर्न केन्द्रीय प्रविधि संयन्त्र निर्माण गर्ने, युवा तथा महिला नेतृत्वलाई कोटामा मात्र सीमित नराखी नीति निर्माण र निर्णय प्रक्रियामा निर्णायक भूमिका दिने तथा नीति अनुसन्धान र तथ्यमा आधारित ‘ज्ञानमा आधारित पार्टी’ निर्माण गर्ने नीति अघि सारेको छ । साथै, जनताको बहुदलीय जनवाद (जबज) को समसामयिक पुनर्व्याख्या गर्ने विषयलाई पनि प्राथमिकतामा राखिएको छ ।
बैठकले पार्टी अनुशासनमा समेत कडाइ गर्ने निर्णय गरेको छ । तेस्रो केन्द्रीय कमिटी बैठकलाई ‘कटअफ’ बैठकका रूपमा लिँदै अबदेखि पार्टीको नीति, निर्णय र नेतृत्वविरुद्ध सार्वजनिक आलोचना, गुटबन्दी वा अनुशासनहीन गतिविधि गरेमा केन्द्रीय संगठन विभागमार्फत स्पष्टीकरण सोध्ने र आवश्यक कारबाही गर्ने निर्णय गरिएको छ ।
यसैबीच, पूर्वराष्ट्रपति विद्यादेवी भण्डारीलाई विधान संशोधन गरी अध्यक्षपछिको दोस्रो वरीयतामा रहने गरी ‘वरिष्ठ नेता’ मनोनयन गरिएको छ । बैठकले केन्द्रीय कमिटी तथा स्थायी कमिटीमा रिक्त स्थानमा नयाँ सदस्यहरूको मनोनयन गर्नुका साथै स्थायी कमिटी सदस्यहरूको निर्वाचनसमेत सम्पन्न गरेको छ ।
बैठकले समसामयिक विषयमा २२ वटा प्रस्तावसमेत पारित गरेको छ । भोटेकोशी र त्रिशूली क्षेत्रमा बाढी तथा पहिरोबाट प्रभावित नागरिकको तत्काल पुनर्स्थापना, बेपत्ताको खोजी र क्षतिपूर्तिको व्यवस्था गर्न सरकारसँग माग गरिएको छ ।
त्यस्तै ग्यास तथा खाद्यवस्तुको मूल्यवृद्धि नियन्त्रण गर्न, अव्यवस्थित रूपमा सुकुम्बासी विस्थापन रोक्न तथा करको दायरा समायोजन गर्न सरकारको ध्यानाकर्षण गराइएको एमालेले जनाएको छ ।
