काठमाडौँ । गैरआवासीय नेपाली संघ (एनआरएनए) राष्ट्रिय समन्वय परिषद् पोर्चुगलले गंगा नेम्कुल र सुरज राईलाई विभिन्न जिम्मेवारीमा मनोनयन गरेको छ ।
एनआरएनए पोर्चुगलका अध्यक्ष सुजन लामा मोक्तानले ५ अक्टोबर २०२६ मा जारी गरेको पत्रअनुसार नेम्कुललाई संघको मेलमिलाप तथा ज्येष्ठ नागरिक सम्बन्धी संयोजक पदमा मनोनयन गरिएको हो ।
नेम्कुलले नेपाली समुदायप्रति देखाउँदै आएको समर्पण, सक्रियता, जिम्मेवारीबोध, सामाजिक प्रतिबद्धता तथा सेवाभावको मूल्यांकन गर्दै उक्त जिम्मेवारी दिइएको संघले जनाएको छ । उनको अनुभव, क्षमता र सामाजिक योगदानले पोर्चुगलस्थित नेपाली समुदायमा आपसी सद्भाव, एकता, सहकार्य तथा मेलमिलाप प्रवर्द्धन गर्न र ज्येष्ठ नागरिकका हित तथा आवश्यकतासम्बन्धी विषयमा प्रभावकारी समन्वय गर्न महत्वपूर्ण भूमिका खेल्ने विश्वास संघले व्यक्त गरेको छ ।
त्यस्तै, सुरज राईलाई एनआरएनए पोर्चुगलको सचिव पदमा मनोनयन तथा नियुक्ति गरिएको छ । नेपाली समुदायप्रति राईले देखाउँदै आएको समर्पण, सक्रियता, जिम्मेवारीबोध तथा सेवाभावको उच्च मूल्यांकन गर्दै सचिवको जिम्मेवारी दिइएको संघले जनाएको छ ।
राईले सचिवको जिम्मेवारी इमानदारी, निष्ठा, पारदर्शिता र पूर्ण जिम्मेवारीका साथ निर्वाह गर्ने विश्वास संघले लिएको छ । पोर्चुगलमा रहेका नेपाली समुदायको एकता, सहयोग र हितका साथै संस्थागत विकास तथा सुदृढीकरणमा उनको महत्वपूर्ण भूमिका रहने अपेक्षा गरिएको छ ।
एनआरएनए पोर्चुगलले दुवैलाई नयाँ जिम्मेवारीका लागि बधाई दिँदै सफल कार्यकालको शुभकामना व्यक्त गरेको छ
