काठमाडौँ । इंग्लिस क्लब म्यानचेस्टर सिटी फिफा क्लब विश्वकपको नकआउट चरणबाटै बाहिरिएको छ ।
मंगलबार बिहान भएको खेलमा साउदी अरेबियन क्लब अल–हिलालसँग ४–३ गोल अन्तरले पराजित हुँदै साविक विजेता समेत रहेको सिटीको यात्रा अन्तिम–१६ मै सकिएको हो ।
जितसँगै अल हिलालले भने अन्तिम आठमा स्थान बनायो ।
खेलको निर्धारित समयमा २–२ को बराबरी भएपछि खेल अतिरिक्त समयमा धकेलिएको थियो । अतिरिक्त समयमा अल हिलालले २ गोल गर्दा सिटीले एक गोल मात्र फर्काउन सक्यो ।
पहिलो हाफको सातौँ मिनेटमा कप्तान बर्नान्डो सिल्भाको गोलमा सिटीले सुरुवाती अग्रता बनाएको थियो । दोस्रो हाफ सुरु भएको ४४ सेकेण्डमा नै मार्कोस लियोनार्डोले गोल गर्दै अल–हिलाललाई बराबरीमा ल्याए ।
५२ औँ मिनेटमा माल्कमको गोलमा साउदी टोलीले २–१ ले अग्रता बनायो । त्यसको तिन मिनेटपछि नै सिटीका एर्लिङ हालान्डले कर्नरबाट गोल गर्दै सिटीलाई बराबरीमा ल्याए ।
निर्धारित समयमा २–२ को बराबरी भएपछि खेल अतिरिक्त समयमा धकेलिएको थियो । खेलको ९४ औँ मिनेटमा चेल्सीका पुर्व डिफेन्डर कालिडो कोउलिबालीले गोल गर्दै अल हिलाललाई खेलमा पुनः अग्रता दिलाए ।
खेलको १ सय ४ मिनेटमा फिल फोडेनले गोल गर्दै सिटीलाई ३–३ को अवस्थामा ल्याए । तर १ सय १२ औँ मिनेटमा मार्कोसले व्यक्तिगत दोस्रो गोल गर्दै अल हिलाललाई ४–३ को जितसहित क्वाटरफाइनल टिकट कटाए ।
अल–हिलालले अब क्वाटरफाइनलमा शुक्रबार ब्राजिलियन टोली फ्लुमिनेन्सविरुद्ध खेल्नेछ । फ्लुमिनेन्सले आजै बिहान भएको खेलमा इन्टर मिलानलाई २–० ले हराउँदै क्वाटरफाइनलमा स्थान बनाएको हो ।
