काठमाडौं । राजविराजमा अस्पतालले भर्ना लिन अस्वीकार गरेपछि एक महिलाले सडकको फुटपाथमै बच्चा जन्माएको घटना प्रतिनिधिसभामा उठेको छ।
राष्ट्रिय स्वतन्त्र पार्टीका सांसद खगेन्द्र कर्णले बिहीबारको संसद् बैठकमा गजेन्द्रनारायण सिंह सगरमाथा अस्पतालको सेवा प्रवाहमाथि प्रश्न उठाउँदै उक्त घटना सार्वजनिक गरेका हुन्।
सांसद कर्णका अनुसार राजविराज नगरपालिका–१४ पर्साहीकी बबिता पासवानलाई सुत्केरी व्यथा लागेपछि अस्पताल लगिएको थियो। तर उनीसँग पर्याप्त पैसा नभएको भन्दै अस्पतालले भर्ना लिन नमानेपछि उनले फुटपाथमै बच्चा जन्माउनुपरेको कर्णले बताए।
हरेराम पासवानकी श्रीमती बबितासँग त्यसबेला २ हजार ५ सय रुपैयाँ मात्रै रहेको उनले संसद्मा जानकारी गराए। आर्थिक अभावकै कारण उपचारबाट वञ्चित हुनुपर्ने अवस्था गम्भीर भएको भन्दै सांसद कर्णले घटनाबारे सरकारसँग जवाफ मागेका छन्।
उनले नागरिकको आधारभूत स्वास्थ्य सेवामा पहुँच सुनिश्चित गर्नुपर्ने भन्दै अस्पतालको उक्त व्यवहारबारे आवश्यक छानबिन र जवाफदेहिता कायम गर्न सरकारको ध्यानाकर्षण गराए।
