काठमाडौँ । स्कटल्याण्डमा जारी आईसीसी विश्वकप लिग २ एकदिवसीय श्रृंखलामा सहभागिता जनाइरहेका सोमपाल कामी र गुलशन झाले चोटका कारण बाँकी खेलहरू गुमाउने भएका छन् ।
प्रशिक्षण सत्रका क्रममा उनीहरु घाइते भएपछि लिग २ मा अहिले जारी नेदरल्याण्ड्ससँगको ओडिआई र त्यसपछि सुरु हुने टी२०आई शृंखला गुमाउने भएका हुन् ।
सोमपालको दायाँ हातमा र गुलशनको घुँडामा चोट लागेको नेपाल क्रिकेट (संघ)ले जनाएको छ ।
चिकित्सकको परामर्शअनुसार दुवै खेलाडी तत्काल उपचार तथा आराममा रहनेछन् । दुबै खेलाडीले हाल भइरहेको लिग २ मा नेपालका लागि राम्रो प्रदर्शन गरेका थिए ।
सोमपालले यसअघिको खेलमा ब्याटबाट शानदार ६७ रन बनाउँदै जितको नजिक पुर्याएपनि नेपाल २ रनले हार्न पुगेको थियो भने गुलशनले पहिलो खेलमा करण केसीसँग साझेदारी गर्दै नेपालको कीर्तिमानी जितमा महत्वपूर्ण प्रदर्शन गरेका थिए ।
