म्याड्रिड । बार्सिलोनाले आइतबार लयमा रहेको भिल्लारियललाई ४–१ ले हरायो । बार्सिलोनाले पउ टोरेसको आत्मघाती गोलमा अग्रता लिएको थियो । लगत्तै जेरार्ड मोरेनाले बराबरी गोल फर्काए । यो संगै स्पेनी ला लिगाको उपाधि होडमा बार्सिलोनाले आफ्नो झिनो आशा जारी राखेको हो ।
लियोनल मेसीको पासमा लुइस स्वारेजले दोस्रो गोल गरेका थिए । मेसीकै पासमा एन्टोइन ग्रिजमनले तेस्रो गोल थपे । अन्सु फातीको नाममा चौथो गोल रह्यो । बार्सिलोनाले प्राप्त गरेको उत्कृष्ट जितमा अगाडि खेल्ने तीन खेलाडी मेसी, स्वारेज र ग्रिजमन सबैको राम्रो योगदान रह्यो ।
यो जितसँगै ला लिगामा मेसीले गोलमा सहयोगी भूमिका खेलेको १९ पुगेको छ र यो एसिस्टको रूपमा सबैभन्दा बढी योगदान हो । यो जितपछि बार्सिलोनाले शीर्ष स्थानमा रियल म्याड्रिडको अग्रता फेरि चार अंकमा छोट्याएको छ । ३४ खेलबाट ७७ अंकसहित रियल म्याड्रिड शीर्ष स्थानमा रहँदा समान खेलबाट बार्सिलोनाको ७३ अंक रहेको छ ।
