काठमाडौं । काठमाडौंको त्रिपुरेश्वरमा रिद्धीसिद्धी यातायातको बसमा भएको आगलागी घटनाको कारण र अवस्थाबारे छानबिन गर्न समिति गठन गरिएको छ ।
काठमाडौं उपत्यका प्रहरी कार्यालय, रानीपोखरीले एसएसपी रमेश बस्नेतको नेतृत्वमा छानबिन समिति गठन गरेको हो । रानीपोखरीका एआईजी सुशील सिंह राठौरका अनुसार समितिलाई घटनाको अध्ययन गरी प्रतिवेदन बुझाउन पाँच दिनको समय दिइएको छ ।
त्रिपुरेश्वरमा रिद्धीसिद्धी यातायातको बा ५ ख ४२७४ नम्बरको बसमा आगलागी हुँदा चालक २५ वर्षीय दावा लामा गम्भीर घाइते भएका थिए । काभ्रे घर भएका लामालाई प्रहरीले उद्धार गरी उपचारका लागि कीर्तिपुरस्थित बर्न अस्पताल पुर्याएको थियो ।
उपचारमा संलग्न चिकित्सकका अनुसार लामाको अवस्था चिन्ताजनक रहेको छ । प्रहरीले आगलागीको कारणसहित घटनाको समग्र अवस्थाबारे समितिले छानबिन गर्ने जनाएको छ ।
