एजेन्सी । श्रीलङ्काको एक अदालतले बिहीबार अपदस्थ राष्ट्रपति गोटाबाया राजपाक्षेको सरकारका दुई पूर्वमन्त्रीलाई ऐतिहासिक भ्रष्टाचारको मुद्दामा दशकौँको जेल सजाय सुनाएको छ ।
पूर्व खेलकुदमन्त्री महिन्दानन्द अलुथगामगे र पूर्व व्यापारमन्त्री अनिल फर्नान्डोलाई कोलम्बो उच्च अदालतले राज्यको कोषको पाँच करोड ३० लाख रुपैयाँ (एक लाख ७७ हजार डलर) दुरुपयोग गरेको अभियोगमा दोषी ठहर गरेको छ ।
गोटाबायाका जेठा दाइ महिन्दा राजपाक्षेको सन् २०१५ को पुनःनिर्वाचनको असफल प्रयासलाई बढावा दिने प्रयासमा १४ हजार क्यारम बोर्ड र ११ हजार ड्राफ्ट सेटसहित बोर्ड गेम दान गर्न सरकारी पैसा प्रयोग गरेकामा ती जोडीलाई दुई हजार डलर जरिवाना पनि गरिएको छ ।
अलुथगामागेलाई २० वर्षको जेल सजाय सुनाइएको छ । फर्नान्डोलाई २५ वर्षको सजाय सुनाइएको छ ।
अलुथगामागे अहिले भ्रष्टाचारको आरोपमा सफलतापूर्वक मुद्दा चलाइएको राजपाक्षे नेतृत्वको मन्त्रिमण्डलका सबैभन्दा वरिष्ठ सदस्य हुनुहुन्छ ।
राजपाक्षे दाजुभाइहरू सत्ताबाट बाहिरिएपछि छ वर्षअघि दुवै जना विरुद्धको मुद्दा सुरु भएको थियो, तर गत वर्ष नयाँ सरकार गठन नभएसम्म यो मुद्दा सुस्त गतिमा अघि बढिरहेको थियो ।
अलुथगामागेले सन् २०२२ मा एक चिनियाँ आपूर्तिकर्तालाई ६० लाख नौ हजार डलरको भुक्तानी गर्न अनुमति दिएको आरोपको छुट्टै अनुसन्धानको पनि सामना गर्नुपरेको छ ।
सन् २०२० मा उहाँले श्रीलङ्काको राष्ट्रिय क्रिकेट टोलीलाई सन् २०११ को विश्वकप फाइनलमा भारतको पक्षमा धाँधली गरेको आरोप लगाउनुभएपछि अनुसन्धान सुरु भयो । यो अन्ततः उहाँको दावीलाई प्रमाणित गर्न असफल भयो ।
सन् २०१० देखि २०१५ सम्म खेलकुदमन्त्रीका रूपमा काम गरेका अलुथगामागेले सन् २०२० जुनमा आफूले त्यस समयमा कथित म्याच फिक्सिङको षड्यन्त्र ‘खुलासा गर्न नचाहेको’ बताउनुभएको थियो ।
“सन् २०११ मा हामीले जित्नुपर्ने थियो, तर हामीले खेल बेचेका थियौँ । मलाई लाग्छ म अहिले यसको बारेमा कुरा गर्न सक्छु । म खेलाडीहरूलाई समावेश गरिरहेको छैन, तर केही वर्गहरू संलग्न थिए”, उहाँले भन्नुभयो ।
मुम्बईको वानखेडे स्टेडियममा भएको फाइनलमा श्रीलङ्का ६ विकेटले पराजित भएको थियो । भारतीय र श्रीलङ्काका दुवै खेलाडीले कुनै पनि गलत काम गरेको कुरा अस्वीकार गरेका छन् ।
