काठमाडौं । राष्ट्रिय स्वतन्त्र पार्टी (रास्वपा) संसदीय दलले प्रतिनिधि सभा बैठकमा सांसदहरूको उपस्थिति थप व्यवस्थित र प्रभावकारी बनाउन समूहगत उपस्थिति तालिका निर्धारण गरेको छ।
रास्वपा संसदीय दलका मुख्य सचेतक कविन्द्र बुर्लाकोटीले सूचना जारी गर्दै संसद बैठकमा सांसदहरूको नियमित र पूर्ण उपस्थिति अपेक्षित रहेको जनाएका छन्। तर व्यावहारिक परिस्थितिलाई ध्यानमा राख्दै संसदको छलफललाई थप गुणात्मक, प्रभावकारी र फलदायी बनाउन शून्य समय तथा समूहका आधारमा न्यूनतम उपस्थिति तालिका निर्धारण गरिएको उनले बताएका छन्।
सूचनाअनुसार असोज ८ गते समूह ३, ४ र १ का सांसद अनिवार्य रूपमा उपस्थित हुनुपर्नेछ। असोज १२ गते समूह १ र २, असोज १३ गते समूह २ र ३, असोज १४ गते समूह ३ र ४, असोज १५ गते समूह ४ र १ तथा असोज १६ गते समूह १ र २ का सांसदको अनिवार्य उपस्थिति तोकिएको छ।
तोकिएको दिन सम्बन्धित समूहका सांसदलाई बैठक सुरु भएदेखि अन्त्यसम्म अनिवार्य रूपमा उपस्थित भई छलफलमा सक्रिय सहभागी हुन निर्देशन दिइएको छ।
अन्य समूहका सांसदलाई संसद बैठकमा उपस्थित हुन अनिवार्य छैन भन्ने अर्थ नलिन पनि रास्वपाले स्पष्ट पारेको छ। विशेष अवस्था बाहेक संसद बैठक सबै सांसदका लागि सधैँ बाध्यकारी रहेको सूचनामा उल्लेख छ।
त्यस्तै, बैठक अवधिमा छलफल प्रभावित नहुने गरी खाजा वा अन्य आवश्यक कामका लागि सांसदहरूले पालैपालो समय मिलाउन भनिएको छ। कुनै प्रस्ताव वा विधेयक निर्णयार्थ सदनमा प्रस्तुत हुने समयमा भने तोकिएका सबै सांसदको अनिवार्य उपस्थिति हुनुपर्ने रास्वपाले जनाएको छ।
मुख्य सचेतक बुर्लाकोटीले सांसदहरूको उपस्थितिलाई व्यवस्थित गर्दै सदनको छलफललाई प्रभावकारी बनाउन यस्तो व्यवस्था गरिएको बताएका छन्।
