लन्डन । युरोपेली च्याम्पियन्स लिग छनोटको होडमा रहेको चेल्सीले मंगलबार तेस्रो स्थानमा लेस्टर र म्यानचेस्टर युनाइटेमाथि चार अंकको अग्रता बनाएको छ । स्टायनफोर्ड ब्रिजमा भएको खेलमा चेल्सीले यसका लागि रेलिगेसनमा परिसकेको नर्विचलाई १–० ले हरायो ।
ओलिभर जिरोडले पहिलो हाफको इन्ज्युरी समयमा निर्णायक गोल गरे र चेल्सी निर्णायक सावित हुन सक्ने तीन अंक बटुल्न सफल रह्यो । अब फ्रायन्क लाम्पार्डको चेल्सीले आफ्नो अन्तिम दुई खेलमा लिभरपुल र उल्भ्सको सामना गर्नेछ ।
लेस्टरले बुधबार सेफिल्ड युनाइटेड र म्यानचेस्टरले बिहीबार क्रिस्टल प्यालेसविरुद्ध खेल्नेछ । चेल्सी यसअघिको खेलमा सेफिल्डसँग पराजित भएर दबाबमा आएको थियो ।
