विराटनगर। कोशी प्रदेशका आन्तरिक मामिला तथा कानुनमन्त्री रेवतीरमण भण्डारीले लोकतन्त्र र पत्रकारिता एक सिकाका दुई पाटा भएको बताउनुभएको छ ।
आन्तरिक मामिला तथा कानुन मन्त्रालयद्वारा राष्ट्रिय पत्रकारिता दिवसको अवसरमा आज यहाँ आयोजित अन्तरक्रियामा उहाँले बजेट, नीति तथा कार्यक्रम तयार गर्ने अवस्थामा सरकारले आम सञ्चारकर्मीबाट सुझावको अपेक्षा राखेको बताउनुभयो । उहाँले लोकतन्त्रमाथि चुनौती दिने र यसको गरिमालाई कमजोर बनाइ जनतामा भ्रम सिर्जना गर्नेसँग सावधान रहन आग्रह गर्नुभयो ।
विद्यमान व्यवस्थामा भएका कमी कमजोरीलाई सच््याउन सकिने तर लोकतन्त्रको विकल्प खोज्न नहुने उल्लेख गर्दै मन्त्री भण्डारीले भन्नुभयो, “पत्रकारिता क्षेत्रलाई बलियो एवं सुदृढ गर्न प्रदेश सरकार प्रतिबद्ध छ ।”
मन्त्रालयका सचिव रामप्रसाद आचार्यको अध्यक्षतामा भएको सो कार्यक्रममा नेपाल पत्रकार महासङ्घ कोशी प्रदेशका अध्यक्ष भरत खड्का र नेपाल पत्रकार महासङ्घ मोरङ शाखाकी अध्यक्ष सुशीला पाठकले पत्रकारिताको विकाससँगै लोकतन्त्रको विकास हुने तर्क गर्नुभयो ।
‘विश्वसनीय सूचनाको अधिकार : जवाफदेहीता पत्रकारिता र सुरक्षित पत्रकार’ प्रमुख नारा रहेको पत्रकारिता दिवसको सो कार्यक्रममा स्वतन्त्र पत्रकार यज्ञ शर्माले पत्रकारिताको समस्या र समाधानका विषयमा कार्यपत्र प्रस्तुत गर्नुभएको थियो ।
