सुर्खेत। वैशाखः कर्णाली प्रदेशका मुख्यमन्त्री यामलाल कँडेलले यहाँका दश जिल्लाका प्रमुख जिल्ला अधिकारी (प्रजिअ) सँग संवाद गर्नुभएको छ ।
उहाँले भर्चुअल माध्यमबाट मनसुनजन्य विपद् र आगलागका घटना, पुनर्निर्माण, पुर्नस्थापना तथा प्रवलीकरणका विषयमा संवाद गर्नुभएको मुख्यमन्त्रीका प्रमुख स्वकीय सचिव सूर्यमणि गौतमले जानकारी दिनुभयो ।
मुख्यमन्त्री कँडेलले जिल्लागत वस्तुस्थितिबारे जानकारी लिँदै प्रदेश सरकारबाट गर्नुपर्ने व्यवस्थापनका विषयमा समेत छलफल गर्नुभयो । उहाँले विपद्पीडितका लागि प्रदेश सरकारले बेहोर्ने ३० प्रतिशत रकम तत्काल व्यवस्था गरिने बताउनुभयो । विसं २०७७ देखि हालसम्म सम्झौता गरेका पीडितलाई स्थानीय तहले २० प्रतिशत, सङ्घ सरकारले ५० प्रतिशत र प्रदेश सरकारले ३० प्रतिशत बेहोर्ने व्यवस्था छ ।
मुख्यमन्त्री कँडेलले सम्झौता भइसकेका लाभग्राहीहरूको विवरण र प्रदेश सरकारले बेहोर्नुपर्ने रकम यथाशीघ्र माग गरेर पठाउन सम्बन्धित जिल्ला प्रशासनलाई निर्देशन दिनुभयो ।
प्रदेश सरकारले चार वर्षदेखि आफ्नो दायित्वको रकम पीडितलाई उपलब्ध नगराएका कारण यसै आर्थिक वर्षमा दिने व्यवस्थाका लागि सम्झौता विवरण माग गरिएको जनाइएको छ । कर्णालीमा करिब ८०० जना पीडितलाई रु ११ करोड भुक्तानी गर्नुपर्ने प्रमुख स्वकीय सचिव गौतमले बताउनुभयो । रासस
