काठमाडौँ। नेकपा एमाले धनुषाको आठौँ जिल्ला अधिवेशन झडपका कारण बुधबारसम्मका लागि स्थगित गरिएको छ।
अधिवेशनस्थलमै अध्यक्ष पदका दुई उम्मेदवार भोला यादव र लक्ष्मीनारायण यादव पक्षबीच विवाद भई झडप हुँदा पाँच जना नेता कार्यकर्ता घाइते भएका छन्। घाइतेमध्ये सत्यनारायण महासेठ र महेश दासको टाउकोमा चोट लागेको छ। वर्तमान जिल्ला अध्यक्ष राजकिशोर यादवमाथि पनि हातपात भएको जनाइएको छ।
भोला यादवलाई केन्द्रीय सचिव रघुवीर महासेठको समर्थन छ भने लक्ष्मीनारायण यादवलाई केन्द्रीय सदस्य उमाशंकर अरगरियाको साथ रहेको छ। दुवै शीर्ष नेताबीच लामो समयदेखि राजनीतिक तिक्तता रहेको बताइएको छ।
उम्मेदवारको अन्तिम नामावली सार्वजनिक गर्ने विषयलाई लिएर सुरु भएको विवाद कुर्सी हानाहान र कुटाकुटसम्म पुगेको थियो। लक्ष्मीनारायण समूहले सचिव महासेठमाथि अधिवेशन प्रक्रियामा एकलौटी गरेको आरोप लगाउँदै धर्ना समेत दिएका थिए।
गत वैशाख २० गतेदेखि सुरू भएको अधिवेशनमा सहमतिको प्रयास असफल भएपछि निर्वाचन प्रक्रियातर्फ जान लागिएको थियो। तर, विवादका कारण मतदान प्रक्रिया अगाडि बढ्न सकेको छैन।
