काठमाडौँ। इण्डियन प्रिमियर लिग (आइपिएल) २०२५ मा कोलकाता नाइट राइडर्सले पाँचौं जित दर्ता गरेको छ। आइतबार इडेन गार्डेन्समा भएको खेलमा कोलकाताले राजस्थान रोयल्सलाई १ रनले पराजित गर्यो।
कोलकाताले दिएको २०७ रनको लक्ष्य पछ्याएको राजस्थानले २० ओभरमा ८ विकेट गुमाउँदै २०५ रन मात्र बनाउन सक्यो। कप्तान रियान परागले ४५ बलमा ८ छक्का र ६ चौकासहित ९५ रन बनाए पनि टिमलाई जित दिलाउन सकेनन्। यशस्वी जैसवालले ३४, शिमरोन हेटमायरले २९, शिवम दुबेले अविजित २५ र जोफ्रा आर्चरले १२ रन जोडे।
कोलकाताका लागि वरुण चक्रवर्ती, हर्षित राना र मोइन अलीले २/२ विकेट लिए भने वैभव अरोराले १ विकेट झारे। टस जितेर पहिले ब्याटिङ गरेको कोलकाताले २० ओभरमा ४ विकेट गुमाउँदै २०६ रन बनाएको थियो। रहमानुल्लाह गुर्बाजले ३५, अजिंक्य रहाणेले ३०, अंगकृश रघुवंशीले ४४ र आन्द्रे रसेलले अविजित ५७ रन बनाए। रसेलको २५ बलमा ६ छक्का र ४ चौका प्रहारसहितको विस्फोटक पारी निर्णायक बन्यो।
राजस्थानका लागि जोफ्रा आर्चर, युद्धवीर सिंह, महिश थिक्साना र रियान परागले एक/एक विकेट लिए। यो जितपछि कोलकाता ११ खेलमा ५ जितसहित अंक तालिकाको छैटौँ स्थानमा उक्लिएको छ। एक खेल वर्षाले प्रभावित हुँदा अंक बाँडिएको थियो। राजस्थानले भने १२ म्याचमध्ये ९ हार्दा मात्र ३ जित निकाल्दै प्लेअफ दौडबाट बाहिरिएको छ।
