काठमाडौँ। नेपाली सेनाको आयोजनामा तथा नेपाल टेनिस संघको प्राविधिक सहयोगमा तेस्रो संस्करणको प्रधान सेनापति राष्ट्रिय टेनिस प्रतियोगिता–२०८२ सुरु भएको छ।
जङ्गी अड्डामा आज एक विशेष समारोहबीच बलाधिकृत रथी श्री निर्मल कुमार थापाले प्रतियोगिताको उद्घाटन गर्नुभयो। टेनिस खेलको विकास तथा उत्कृष्ट खेलाडी उत्पादन गर्ने उद्देश्यले सञ्चालन गरिएको प्रतियोगितामा विभिन्न ९ वटा क्लबका १५ जना महिला सहित कुल १९६ जना खेलाडीहरूको सहभागिता रहेको छ।
प्रतियोगिता वैशाख २८ गतेसम्म जङ्गी अड्डा र दशरथ रङ्गशालास्थित टेनिस कोर्टमा सञ्चालन हुनेछ। खुल्ला तथा भेट्रान्सतर्फ विभिन्न १२ विधाका प्रतिस्पर्धात्मक खेलहरू यस प्रतियोगितामा समावेश गरिएका छन्।
उद्घाटन समारोहमा नेपाली सेनाका रथीवृन्द, नेपाल प्रहरी, सशस्त्र प्रहरी बल नेपाल, राष्ट्रिय अनुसन्धान विभागका प्रतिनिधिहरू, नेपाल टेनिस संघका अध्यक्ष तथा पदाधिकारीहरू, विभिन्न टेनिस क्लबका पदाधिकारीहरू, नेपाली सेनाका अधिकृतहरू, सञ्चारकर्मीहरू तथा खेलाडीहरूको उल्लेखनीय उपस्थिति रहेको थियो।
