काठमाडौं । नेकपा एमाले बैशाख ११ गते हुने लोकतन्त्र दिवसको तयारीमा जुटेको छ ।
लोकतन्त्र दिवसको अवसरमा एमालेले काठमाडौंको भृकुटी मण्डपमा जनताले जितेको दिन युवा सेलिब्रेसन कार्यक्रम गर्दै छ । सो दिन पार्टी र जनसंगठन आबद्ध युवाको उल्लेख्य सहभागिता जनाउने गरी कार्यक्रम गर्न आवश्यक तयारीमा लागिएको पार्टी संगठन विभाग सचिव माधव ढुङ्गेलले जानकारी दिनुभयो ।
कार्यक्रम सहिजिकरणको नेतृत्व गरिरहनुभएका ढुङ्गेलले सेलिब्रेसनलाई सफल बनाउन पार्टीबाट काठमाडौंमा निर्वाचन जितेको जनप्रतिनिधिको भेला भएको जानकारी दिनुभयो ।
आजै जनसंगठनका केन्द्रीय पदाधिकारीको भेला पनि राखिएको छ । आज पार्टीको सम्पर्क, समन्वय कमिटीसँग बैठक पनि आयोजना गरिएको ढुङ्गेलले जानकारी दिनुभयो ।
बैशाख ११ लाई विशेष उत्सवको रूपमा मनाउन नेकपा एमालेले युवा सहभागिताको आह्वान गरेको छ । कार्यक्रमलाई एमाले अध्यक्ष प्रधानमन्त्री केपी शर्मा ओलीले सम्बोधन गर्ने कार्यक्रम रहेको छ । त्यसै गरी युवा लक्षित विभिन्न कार्यक्रम र कन्सर्ट आयोजना गरिने भएको छ ।
