काठमाडौं। ललितपुर सिटि एफसी नेपाल सुपर लिग (एनएसएल)को फाइनलमा प्रवेश गरेको छ ।
दशरथ रंगशालामा भर्खरै सम्पन्न पहिलो क्वालिफायर खेलमा धनगढी एफसीलाई २-१ गोलले हराउँदै ललितपुरले फाइनलमा स्थान बनाएको हो । तनावपूर्ण बनेको खेलको पहिलो हाफमा १६ औं मिनेटमा ललितपुरका मणि कुमार लामाले रातो कार्ड खाएपछि ललितपुर १० खेलाडीमा समेटियो ।
धनगढीका मोहम्मद अल्जसँग जुधेका लामालाई रेफ्री उमेश बिडारीले सिधै रातो कार्ड देखाए । दुबैले एकअर्कामाथि ट्याकल गरेका थिए । तर रेफ्रीबाट लामाले कार्ड पाए ।
ललितपुरका खेलाडी, प्रशिक्षक तथा फ्यानहरु उक्त निर्णयबाट सन्तुष्ट देखिन्थेनन् । पहिलो हाफको इन्जुरी समयमा ललितपुरका केर्भेन्स फिल्स बेल्फोर्टको सशक्त प्रहार गोलपोस्टको देब्रेतर्फबाट थोरैमात्र बाहिर गयो ।
खेलको ५६ औं मिनेटमा बेल्फोर्टले गोल गर्दै ललितपुरलाई सुरुवाती अग्रता दिलाए । उनले फ्रीकिकबाट उत्कृष्ट गोल गरे । यता, खेलको ६१ औं मिनेटमा धनगढीले बराबरी गोल फर्कायो । जर्ज प्रीन्स कार्कीले गोल गर्दै टोलिलाई १-१ को बराबरीमा ल्याएका हुन् । दिपेश राईको सट्टामा बैकल्पिक खेलाडीमा रुपमा मैदान प्रवेश गर्नेबित्तिकै उनले गोल गरे ।
७३ औं मिनेटमा धनगढीका अहमद हिजाजीले अग्रता बनाउने अवसर गुमाए । जर्ज प्रीन्सबाट लामो पास पाएका उनी ललितपुरका गोलकिपर जेफरी बाल्टससँग वान टु वानमा हिजाजीले सन्तुलन गुमाउँदा उनी गोल गर्न चुके ।
७९ औं मिनेटमा ललितपुरले अग्रता बनायो । पापा इबोउ केबेले गोल गर्दै ललितपुरलाई २-१ को अग्रता दिलाए । ३५ यार्डबाट ८९ किलोमिटर प्रतिघण्टाको गतिमा प्रहार गरेको उनको बललाई धनगढीका गोलकिपर वालिद बिरोउले छेक्ने कुनै मौका पाएनन् ।
पराजित धनगढीलाई फाइनलमा पुग्ने अवसर भने बाँकी नै छ । भोलि आइतबार हुने पोखरा थन्डर्स र चितवन एफसीबिचको एलिमेनेटर खेलको विजेतासँग धनगढीले फाइनल प्रवेशका लागि खेल्नेछ ।
